MIZO STUDENTS’ UNION 23RD GENERAL CONFERENCE VANTLANG INKHAWM ZAN CHU PROF. LALNILAWMA, MINISTER OF STATE CHUAN KHUALLIAN NIIN A HMANPUI

#ZONEWS Hnahthial, October 9, 2025 : MSU General Conference vawi 23-na, Hnahthial District a neih mek chu a zan hnihna, Vantlang Inkhawm Programme, Minister of State, Prof. Lalnilawma’n khuallian niin a hmanpui a. Harsatna hi nuna bet tlat a ni tih hre reng turin zirlai kalkhawmte hnenah fuihna thuchah a sawi.

Khuallian chuan tuna National Education Policy, 2020 hman mek in a ngaih pawimawh deuh pakhat chu harsatna sutkian dan – problem solving skills a nih thu sawiin chu chu nuna zirlai pawimawh tak pakhat a ni a ti a. Hlawhtlinna chauh chan tum, hlawhchham ngai lo chuan a nunah harsatna emaw hlawhchhamna emaw a tawh hunah a nun a buai mai thin a, chuvang chuan hlawhtlinna chauh chan tum lovin harsatna tawh hi nuna thil pawimawh tak mai, mihring min chher hriamtu a ni tih hre turin zirlaite chu a chah a ni. Graduate degree nei, nu leh pa a la innghat nih ai chuan eng anga hna hniam a kan ngaih pawh thawk hreh lo, mahni intodelh nih hi a zahawm zawk a ni a ti bawk. 

“Hlawhtlinna hi Hlawhchhamna atanga pen khatah a awm” tiin zirlaite chu an hlawhchham pawn beidawng lova, bei hram hram zel turin a fuih a. Mahniin nuam kan tih chin atanga kan pen chhuah loh chuan hlawhtlinna kan chan loh mai bakah kan nih theih tur ang kan ni thei dawn lo a ni tiin zirlaite chu harsatna leh hrehawmna paltlang ngam turin a fuih a ni.

Zanin vantlang inkhawm hi MSU Finance Secretary, C. Lalhmangaihzuala’n kaihhruaiin mal zai leh hnam lam hrang hrang nen hun hman a ni.

Naktuk chawhma Vantlang Inkhawmah Chief Minister, Pu Lalduhoma chuan Khuallian niin hun a hmanpui ang.