Mizoram State Project Monitoring Committee-in Thenzawla Working Women Hostel sak mek an tlawh

#ZONEWS Serchhip November 4, 2025: Mizoram State Project Monitoring Committee chuan vawiin an Vice Chairman Pu R. Lal Rinawma IRS (Rtd) hovin Thenzawla Working Women Hostel sak mek a hmunah an tlawh.

Vawiin a MSPMC Vice Chairman hova Working Women Hostel Thenzawla sak mek endikna ah hian hnathawh kallai basement chhun mekah technical thil tihthat ngai, concrete making, component meterial, rora size, balu chungchang ah te siamthat ngai lai an hmuhte chu a hmunah a theih ang ang sawiho nghal a ni a. He hna thawktute chu nakin hnu ah an hnathawh te sawiselna a awmlohna turin uluk lehzual an hnathawh te vil uluk turin an chah bawk.

He hunah hian MSPMC Secretary Er. Lalthanzuala Ralte bakah Member thenkhat ten an tawiawm a, Nodal Department- Women & Child Development Department bakah PWD-a thawktute an tel bawk.

Working Women Hostek hi SASCI 2024-2025 sum cheng 892,12,045.00 senga sak niin a sak hna thawktu hi Khiangte Construction & Consultancy Services an ni a, May ni 15 2026 a zawh hman tura ruahman a ni.