Vawiin hian Axiom-4 Mission-a feh chhuak, Captain Shubhanshu Shukla leh a hote mi pathumte chu an zinna hmun space station atangin an rawn kir ṭan dawn.

#ZONEWS July 14, 2025: Science and Technology Minister Dr. Jitendra Singh chuan a Social Media post-ah, Vawiin dar 4:30 PM hian Axiom-4 Mission-a feh chhuakte chuan an hmun an rawn chhuahsan ṭan dawn thu a sawi a. A sawi zel danin, Captain Shubhanshu Shukla leh a hote pathumte hian naktuk July 15, 2025 chawhnu dar 3 hian lei an rawn thleng dawn a ni. Leia an rawn tum hnuah, Captain Shukla leh midang pathumte hian ni sarih chhung lei hipna (gravity) a inseam rem turin, Flight Surgeon enkawlna hnuaia hun an hmang leh phawt dawn a ni.

Captain Shukla leh a hote hi ni 14 chhung tihtur (14-day mission) hun hmangin International Space Station-ah hun an han hmang a. Captain Shukla hi Indian zinga International Space Station tlawhtu hmasa ber a nih bakah, Indian Astronaut zingah, kum 1984-a van boruaka kal, Wing Commander Rakesh Sharma hnua van boruaka han kal pahnihna a ni bawk. Van boruaka an han zin chhung hian, India tan bik liau liau thil enchhinna (experiment) pasarih an han ti a. Lucknow, Uttar Pradesh-a awm Captan Shubhanshu Shukla pa, Shambhu Dayal chuan, him taka a lo kir theih nan Pathian hnenah an tawngtai thu a sawi a ni.

#zonews #ramchhung #Axiom4