#ZONEWS: Home Minister Pu K. Sapdanga’n tunhnaia larsapin Chakma Autonomous District Council Governor Rule-a a dah chu Council of Minister ngaihdan lo anga tih a nih thu a sawi.

#ZONEWS July 8, 2025: Home Minister Pu K. Sapdanga’n tunhnaia larsapin Chakma Autonomous District Council Governor Rule-a a dah chu Council of Minister ngaihdan lo anga tih a nih thu a sawi.

Vawiina Secretariat Conference Hall, MINECO, Aizawla chanchinbumite a kawmnaah he thu hi sawiin Home Minister chuan nimina Chakma Autonomous District Council Governor rules hnuaia dah chungchangah mipuite tana thil ngaihsual palh theih a awma hriat a vangin, thil awmdan sawifiah sorkarin tul a tih thu a sawi a. Chakma Autionomous District Council-ah elected member 20 an awm thu leh heng zinga member 16 chuan tun hnaiah ZPM party an zawm thu a sawi a. Heng MDC 16 hian ZPM Legislature party insiamin, CADC sorkar an siam thei a ni tih thla hmasa Ni 16 khan an lantir tih a sawi a. Heng MDC 16-te hi Aizawlah lo pheiin Governor hmaah thla hmasa ni 18 khan an inlan thu leh MADC-ah ZPM Council sorkar an siam theih thu thlenun siamtir turin an dil nghal thu a sawi a.

Hei hi Chief Minister Pu Lalduhoma pawhin Larsap hnenah, member 16 nei ZPM Legislature Party chu CADC-ah sorkar siamtir mai tha a tih thu a lo thlen tawh tih sawiin Home Minister chuan Larsapin Council of Ministers ngaihdan ziaka thlen tura a phut angin Council of Ministers chuan lungrual takin sorkarna siam thei an awm chuan Council thiah chu tha a tih loh thu leh, member 16 nei ZPM MDC-te chu CADC-ah sorkarna siamtir mai turin, tun thla ni 5 khan Larsap hnenah ziakin Council of Ministers ngaihdan thlen a nih thu a sawi a. Larsapin Council of Minister ngaihdan ziaka thlen tura a dil hnuah, Council of Ministers ngaihdan ni lo zawnga thutlukna a siam leh ta tho si chu vanduaithlak an tih tak zet thu leh, Democracy zahawmna tihmelhem thei ni hiala an hriat thu a sawi a. Hei vang hian Larsap in CADC a thiahna chu sut leh ni se tih chu Council of Minister ngaihdan a nih thu a sawi a ni.

Home Minister tawiawmtu District Council & Minority Affairs Minister Pu C. Lalsawivunga pawhin chanchinbumite zawhna chhangin Autonomous District Council -ah Anti Defection Law a awmloh avangin nihna inchuh avangin sorkar a nghelngheh theih loh thu a sawi a. Hei hi Chief Minister pawhin a lo sawi tawh angin 125th Ammendment ah Anti Defection Law chu sorkarin an rawt ve thu a sawi a ni.