MLA Lt. Col. Clement Lalhmingthanga’n Champhaiah Chief Minister’s Special Package atana Orientation Training a hmanpui

#ZONEWS Champhai July 31, 2025: Vawiin khan Champhai South bialtu MLA Lt. Col. Clement Lalhmingthanga chuan I&PR Auditorium, CHANEM Building-ah Orientation Training a hmanpui a, he training hi Bana Kaih hnuaia Chief Minister’s Special Package atana thawhpui tura thlan bik, Progress Partner te tan a ni.

MLA Lt. Col. Clement Lalhmingthanga chuan he training pawimawh taka a tel hi lawmawm a tih thu a sawi a, CM Special Package hi mipuite tana siam, mahni inchawi kan theihna tur a nih thu sawiin Progress Partner thlan chhuah te a lawmpui thu a sawi. He scheme atang hian aia sangah inhlan kai zel tum turin a sawm a, sawrkar hi mitin ta a ni a, sawrkar tichak tur chuan mahni intihchak a ngai a ni tih a sawi. Department hotute pawh Progress Partner te nen tha taka thawk hoa Champhai District hming timawitu ni turin a sawm a, scheme hlawhtling taka kalpui a nih theih nan duhsakna sang ber a hlan a ni. MLA hian training certificate Progress Partner te hnenah a hlan bawk a ni.

He training programme hi SDO (Sadar) Pu Ngulzathuama’n a kaihruaia a, Champhai Bawrhsap Pu Mohammad Aaquib chuan Progress Partner te hnenah certificate a hlan a, line department te leh Progress Partner te hnenah he scheme tihlawhtlingtu an ni tih sawiin lawmthu a sawi a, hamthatna leh tanpuina awm apiang hmang tangkaia taima taka thawk turin a chah a ni. District Horticulture Officer Pi Lalrinchhani chuan Bana Kaih leh CM Special Package chungchang, a thiltum te, kalpui dan tur te leh department leh Progress Partner te thawhho dan tur te a sawi a. Entrepreneur Pu Laldanmawia chuan “Introduction to Entrepreneurship & Basic Business Management” tih thupui hmangin mahni sumdawnna enkawl dan chungchang a sawi a, Govt. Champhai College Commerce Department HOD Pu Ramnundanga chuan sum enkawl dan te, bungrua hralh leh lei zat vawn dan te a sawi. Department hotute’n thusawina hun an nei bawk a, SDC Pu Lalchhuanawma Ralte chuan lawmthu sawina hun a hmang a, training khar a ni.

Training-ah hian department hotute leh Progress Partner thahnem tak an tel a ni.