SIAHA-AH DISTRICT NASHA MUKT BHARAT ABHIYAAN (NMBA) COMMITTEE THUTKHAWM NEIH A NI

#ZONEWS Siaha July 31, 2025: Vawiin chawhma dar 11 khan DC Mini Conference Hall, Siaha-ah District Level Nasha Mukt Bharat Abhiyaan (NMBA) Committee an thukhawm a, he thutkhawm hi Pu VL Hruaizela Khiangte, DC Siaha leh Chairman Siaha District NMBA Committee nibawk chuan a kaihruai.

Chairman Pu VL Hruaizela Khiangte chuan member kalkhawmte inlawmna thu sawiin, India ram pumah Ministry of Social Justice and Empowerment hnuaiah Nasha Mukt Bharat Abhiyaan kum 5 kalpui a nih champhaphak chu August 1st leh 31st inkarah hman tur niin, hemi hun chhung hian zirna inah leh office-ah ruihhlo ti lo tur leh a that lohzia sawirualna (mass pledge) hun hman tur niin August 13-ah a bîk taka hun hmang tura (special drive) beisei kan nih thu a sawi.

Siaha District-ah NMBA kalpui a nih atanga hmalakna hrang hrang thlirletna neih niin, Mizoram chhungah chuan Siaha district chu NMBA kalpui tha ber pawl ni-a a hriatthu Chairman chuan sawiin, amaherawhchu a mi cheng zat atanga chhut chuan ruihhlo ngai enkawl tur nei nasa pawl a nileh thung ni-a lang chu pawi a tih thu a sawi. NMBA thiltum chu ruihhlo bawiha tang mêkte kawng hrang hranga chhanchhuah dan kawng dap a ni a, chumi tur chuan sawrkar, kohhran leh tlawmngai pawlte tangruala ruihhlo do chhunzawm zel a tul thu a sawi bawk.

Sawrkar laipui duh dan angin August 1st leh 31st inkarah Nasha Mukt Bharat Abhiyaan kum 5 kalpui a nih champhaphak chu Siaha district-ah pawh urhsun taka hman nise tih a ni a, Kohhran hrang hrangah Ruihhlo that lohzia inzirtirna hun sermon-ah emaw kohhran thalai pawl inkhawm/fellowship-ah emaw Secretary thupuanah emaw sawi tura ngenna siam nise, sawrkar office zawng zawng, zirna in leh MADC office-ah ruihhlo ti lo tur leh a that lohzia sawirualna (mass pledge) hun hmang tura ngenna siam nise, thu sawirual tur pawh ngenna siam rualin Mizo tawng leh Mara tawnga inziak thiltel nise tih niin; BDO Siaha leh BDO Tipa huam chhunga khua zawng zawngah vantlang aurinna hmangin ruihhlo thatlohzia puan nise tih a ni bawk.

August 13-ah a bîk taka hun hmang tura (special drive) ngenna dawn anih angin hemi ni hian zingkarah zirlai naupang leh NMBA committee member-te’n SDFA ground Meisatla-ah Ruihhlo that lohzia inzirtirna hun hman tur niin, hun hman zawh hian Meisatla field thleng Ke-a kal runpui (walkathon) neih nise tih a ni. Hemi ni vek hian Higher secondary school zirlaite tan Ruihhlo thatlohzia inzirtirna Essay inziahsiak neih tur a ni a, College zirlaite tan Debate neih tum a ni bawk.

Pi LS Lalbiakzuali, District Social Welfare Officer, Siaha leh Member Secretary, Siaha District NMBA Committee nibawk chuan Siaha district-ah September 6, 2024-ah NMBA kalpui tan anih thu sawiin NMBA hnuaia thiltih zawng zawng portal-ah thlalak leh video upload vek anih thu a sawiin memberte chu tlawh thin turin a sawm bawk.

Vawiin thutkhawmah hian Addl. SP Pu Beimosia Lapi, Addl. DC Pu Abraham Beirazi Khithie, DMS Dr. C. Lalrosanga, Pi Zorinsangi, SDC, Nodal Officer, NMBA leh NMBA member te an tel a ni.