SAWI LOH ANGA AWM ? – David Sailo

Tuna kan Ministry hrawn mek hi mi tam tak sawi dan hi kan hre tlanglawnin a rinawm a, “Kan ti ang an tih an ti lo chu a hriatthiam theih a, kan ti ve lovang an tih an ti leh zel si hi a ni” tiin.

Kawng chungchang bik sawi ila. An Sorkar hnu a kawngsiam hun (Working Season) tha tak mai an bawhpelh ringawt mai kha pawi tak a ni a, kan tuar chho mek zel a ni. Zoram mipui hi enkawl nuam tak kan ni a, kan lawmna ho te, kan lungawilohna ho te a ni. Kawngpui tha se, Ration buhfai hnianghnar ila, Sorkar hnathawkin hlawh la tha se, ni 100 inhlawhna hmu tha ila, a nawlpui hi chu kan lawm em em mai a ni.

Kawngpuiah chuan MNF tluka fakawm an la awm lo. Theihtawp an chhuahna a ni a, kan lungin a zir lova, a tih hleih theih loh tih an hria, thal hun tha an bawhpelh lo chungin furin min nuai na em a, a harsa a ni. Kawngpuiah kher hi chuan No.1 a dah lo tan chuan kumtin hmingchhiat a ni ringawt mai!! Kum khat lek thapui thawh loh hi a leh pek kum thum zet tawrhna tluk a ni zel.

“Chhiah hrang hrang kan ti pung dawn em? Hnai love” tih Video a lâr vak laiin Petrol/Diesel man chu vawikhat tih to ah chuan sang takin a to thut a, mahse an Social Media Worker te leh engtin tin emaw hmangin mipui phun lutuk tur ven nan theih tawp an chhuah a, chung ho auhla ber chu “Petrol Litre khat i lâk khan kawng siam nan chuti zat i thawh ve a ni” ti zawngin mipui Contribution chawilenna hmangin min hmin reh thiap a.

Mahse, kumin March thla thleng khan tuialhthei man tih tona chu kawng siam nan pakhatmah hman a la nih loh thu hriat a ni leh a, an Social Media Worker te thupui ber chu engmah lo ah a chhuak chiang ta hle a ni. Petrol Litre khat kan leia kawngsiam nana kan hnatlanna chu khawiah tuan ta maw?!!

ZPM Ministry ah hian “Darkhuang mual, Pûm, Aizawl Population, Kawng tlo lo tih tawp, Power a intodelh Etc” intiamna a tam mai. Heng hi tute beihna mah a ni lova, thu inchhang ang deuhin mahni thusawi vuakletna vek a la ni. Mipuiin an thlir fo chu heng Campaign laia awlsam taka thusawi tam tak, a Video a awm thlap te hi ngaihmawha an neih loh chuan Opposition aia thinglet nasa zawk tur a la ni dawn. Inthlan a hnai tial tial anga, a thing na telh telh ang.

TLIPNA :
State BJP hruaitu inthlak danglam hi kan Sorkar hrawn mek tan hian malsawmna tur nge kawrawkna lehzual thlentu ni ang?

#zonews #article #davidsailo