New Serchhipah August ni 4 atangin bawlhlawh thliar hrang tan dawn; bawlhhlawh paih man thar bithliah a ni

#ZONEWS Serchhip, July 24, 2025: Vawiin khan Serchhip Sanitation Task Force chu an Chairman Pu Paul L Khuma hoin Serchhip DC Meeting Hall-ah an thukhawm. August ni 4 atanga New Serchhip area chhunga hman tan tur bawlhhlawh tawihthei leh thei lo thliar chungchang te, Serchhip khawpui pumpuia kalpui dan tur te leh bawlhhlawh paih man thar bithliah chungchang te an rel.

UD&PA leh Green Herd SP, Serchhip te thawhhonain Serchhip khawpuiah bawhhlawh thliar hran, sawngbawl leh in tin atanga khawn hna hi kalpui a ni tawh dawn a. A enchhinna leh bultanna turin New Serchhip North leh South VC huam chhungah August ni 4, 2025 (Thawhtanni) atang hian in tinah bawlhhlawh tawih thei leh thei lo thliar hran tan a ni tawh dawn a ni. Bawlhhlawh hi UD&PA ten khawn tawh loin Green Herd SP te hian in tinah an khawn dawn a. Bawlhhlawh paihna point hranpa siam loin chhungtinte kawtkai atangin bawlhhlawh hi an khawn thin dawn a ni.

Bawlhhlawh khawn leh paih man hi thla khatah cheng 100 zel lak a ni tawh dawn a. Chhungkaw khawsak harsa zual te erawh chu ngaihhnathiam an ni ang. Sumdawnna hmun, dawr, office, school/college/institution, hotel leh a dangte hnen atanga bawlhhlawh khawn man pawh a hranpaa bithliah a ni dawn a. Hei hi UD&PA leh Green Herd te kutah dah niin rem an ruat angin New Serchhip Area ah an kalpui chhin dawn a ni.

Bawlhhlawh phur motor tlan dan tur leh bawlhhlawh khawn dan tur UD&PA leh Green Herd in an duan chu meeting ah hian pawm a ni a. Tawih theilo hi Thawhtanni, Thawhlehni leh Nilaini ah; tawih thei hi Ningani, Zirtawpni leh Inrinni ah, zing atanga tlai thleng an khawn thin dawn a ni.

Bawlhhlawh paih dan chungchang inzirtirna neih ni se tiin meeting chuan a rel a. July ni 28 zanah New Serchhip North leh South VC te kaihhruaiin Gram Sabha koh a ni dawn a. YMA Information Centre atanga puan thin a nih dawn bakah social media kaltlangin thehdarh thin a ni bawk ang.

Pilot Project hi New Serchhip area-ah thlakhat chhung kalpui phawt ni se tiin meeting chuan a rel a. Thlakhat ral hnuah thlirletna hun neih a ni anga. Serchhip Town Area pumpuia hman hun tur rel a ni ang.

Green Herd SP, PHED leh UD&PA te thawhhonain bawlhhlawh sawngbawlna hmun Lungrual ramah siam a ni tawh a. Bawlhhlawh sawngbawlna hmunah hian bawlhhawlh tawih theilo te hi a then tum tel (bale) a siamin, hralh a ni anga. Hralh tlak loh te hi meikhu siam loa halralna khawl smokeless incinerator hmanga halral a ni ang. Bawlhhlawh tawih thei te hi Tualthah Muala dumping ground ah paih a ni thung ang.