Ni 2 chhung awh tur Health & Family Welfare Department, Mizoram hnuaia Laboratory Technicians ten training nei

#ZONEWS Mizoram October 15, 2025: October 15-16, 2025 chhunga neih tur Health & Family Welfare  Dept. hnuaia thawk District hrang hranga Laboratory Technicians te tana Training for Free Diagnostic Services, Free Diagnostic Service Initiative Programme(FDI), NHM leh Regional Resource Centre for North East States (RRC-NE) te tangkawp hmalakna in vawiin zing dar 10:00am khan Taxation Auditorium, MINECO-ah a hawnna hun hman a ni a. He hunah hian Dr. Lily Chhakchhuak, Mission Director, NHM chuan khuallian niin a hmanpui.

Dr. Mary Zohmingliani, State Nodal Officer, FDI, NHM chuan kaihhruaiin Training buatsaih a nih chhan te sawifiahin ṭangkai taka kan thawhna ṭheuh Damdawiin a mipui ten tangkai zawk a an chhawr theihnan kan khawl neih te hmang thiam tura training hi buatsaih a nih thu a sawi.

Dr. Lily Chhakchhuak, Mission Director, NHM chuan RRC-NE te thahnemngaihna leh inpekna a training an rawn sponsor avanga lawmthu sawiin, Mizoram sorkar(NHM) leh MHSSP, 15th Finance Commission leh PM-ABHIM te tangkawpin tun kum 2 chhung hian facility tinah an mamawh tur khawl hrang hrang changkang tak tak dah a nih thu a sawi. Heng khawl te hi CHC, PHC leh UPHC ah te dah vek niin, Laboratory Technicians ten thiam taka an hman theih chuan mipui ten an hmang tangkai dawn hle a nih thu a sawi a. Tun tuma training hi tangkai taka hmang a, chiang zawka thiam turin a duhsak thu a sawi a. Thawktu te chu mipui leh sawrkar tana thawk an nih ti hrereng chunga taima taka thawk zel turin a chah a ni.

Mr. Bhaswat Kumar Das, Senior Consultant, Regional Resource Centre, North East chuan RRC-NE ten kumdangah chuan SNO te Guwahati-ah ko thla in workshop an a neihpui thin a. Kum 2 kalta atang khan tihdan thlakin, North East State tinah Laboratory Technicians te tan training hi an neihpui thin a, hei hian state dangah pawh hmasawnna nasa tak a thlen thu a sawi a. Mizoram pawhin hma a sawn pui ngei a beisei thu  sawiin ngun taka zir turin a chah bawk.

He training bikah hian Haematology Analyser leh Semi-Auto Analyser khawl bikte hman dan inzirtirna Practical in neih a ni a. Zoram Medical College & Hospital atangin mithiam ten training hi an pe. Training chhung hian Taxation Dept a thawktu te thisen exam hrang hrang an tih sak nghal bawk.