PATHIAN BIAKNA DIK TAKAH CHUAN KAN THINLUNG LEH KAN THILTIHA KAN INTHLAK THLENG A, KAN DANGLAM A ṬUL A NI.

#ZONEWS #FIANRIAL August 04, 2025:
Vawiina kan fianrial hunah chuan Josia chanchin hi ngaihtuah leh ila, Pathian thu zial mipuite hnena a chhiar hnu chuan, Pathian chu a au ta a, Juda hnamte chu Pathian thutiamah chuan a hruai let leh ta bawk a ni. Danglamna siam turin hma huaisen takin a la a; milem biakna tibo turin a che chhuak nghal a, Baala puithiam ho zawng zawng an ram atangin a hnawt chhuak vek bawk a, Baala hnena inthawina hmunsangte chu a tichimin a tichhe vek bawk a ni.

JOSIA SIAMṬHATNA CHU
Mosia dan zawng zawng anga thinlung zawng zawng leh thlarau zawng zawng leh chakna zawng zawnga LALPA pawm, amah ang rêng rêng a hmaa lal tumah an awm lo va; a hnuah pawh amah ang chu tumah an awm leh tawh hek lo. (2 Lalte 23:25)

Thlemna leh tibuaitu hrang hrang awmna kan khawvelah hian Pathian hnena inpumpekna dik tak chu eng angin nge lantir a nih thin le?

Lal Josia nun chuan a chhanna awmze nei leh ril tak min pe a ni. Pathian thu zial a chhiar hnu chuan Josia chu a mite Pathian nena an thu tiam siam thar leh turin a che chhuak nghal a. Pathian thu chuan kan thinlung a hneh avanga kan thiltihah danglamna kan thlentir ve nghal khawpin Pathian thu chu kan inhnehtir ve thin em?

Josia inpekna chu thu maiah a tawp lova. Baala puithiam zawng zawng chu hnawhchhuah vek tur thu a pe nghal bawk a. Amah ngeiin milem biakna hmun sang an tihchhiatte chu a enpui bawk a ni. A hming maia thilti a ni lova, Pathian thu avanga a thiltih hi a thukin a ril hle mai, Judate hnen atanga milem biakna zawng zawng chu a zavaia thenfai vek a, Judate tihthianghlim leh chu a tum a ni a. Chutiang chuan a takin a che chhuak nghal hmiah mai a ni.

Pathian tana hmun kian turin eng milemte nge kan nun atang hian kan paihboa kan tihchhiat ngai ve le?

Mipuiten thlarau lama an rochan chu an hmuh let leh theihna turin Kal hlen kut pawh a ngai angin a kalpui leh a. Pathian hnam thlan an nihna leh Pathiana an zalenna chu Kal hlen kut an hman lehna chuan an rilruah a tuh thar leh a ni. Nasa taka Josia’n hma a la chung chuan tam tak chuan an nun dan tha lo zawk kha an la ngai tho mai. Hei hian thutak kan hriat hnuah pawh kan hun kal tawh sualah kan la awm fo thin zia leh chu chu mi zawng zawngin kan beih leh kan zavaia harsatna in ang tlang chu a ni tih min hrilh a ni.

Pathianin nun thar leh zalenna min pek chu a zavaia lo pawm ve turin engtin nge hma kan lo lak ve ang le?

Josia siamthatna chuan pawn lam lang thei a milemte chu tihbo a tum a ni ringawt lova; thinlung leh rilru thlakthlenga siam danglam chu a tum a ni. Pathian biakna dik tak chu pawn lam lang thei leh langthei lo thinlunga Pathian tana inpumpekna a ni tih a hre chiang hle a ni.

Kan rinna hmanga kan thiltih nena inmil thei tur Pathian biakna dik tak thinlung chu engtin nge kan neih ve theih ang?

NGUN TAKIN INNGAIHTUAH ILA
Pathian nena kan inlaichinna aia ngaih pawimawh zawk milemte, kan rilru lapeng thei thil dang engte nge kan nunah kan luhtir ve thin thil te a awm em tih ngun takin inngaituah ila. Chung thilte chu tibo turin a taka kan thiltih theihte chu engte nge ni le?

Nitin Bible chhiar leh tawngtaina atan kan hun tlem tal pe thin ila. Kan thutlukna siamah te leh kan thiltihah te Pathian thu chu a lo telve phal ila, min kaihruaituah I hmang thin ang u. A ṭul dan ang zelin thlarau lama kan thiltumte tihlawhtling turin Pathian thu lama kan rin ngam thiante emaw midangte emaw pawh I zawng thin ang u.

ṬAWNGṬAINA
Tin, LALPA ina puithiam Hilkian a char lehkhabua dan thu chuangte kha a tihngheh theih nân ramhuai aienthiam zâwl te, dawithiam te pathian lem te, milem te Judai ram leh Jerusalem khuaa thil tenawm an hmuh thin zawng zawngte chu Josia chuan a tibo vek bawk a (2 Lalte 23:24).

Aw Lalpa, Ka hun hman tawh dan ka chhui letin, tun dinhmuna ka awm anga awm thei tura min kaihhruaina leh min venhimna zawng zawng avangin lawmthu ka hrilh a che. Nangmah dik taka ka biak theih nan che, ka nuna milem pathian diklo leh I duhloh zawng thilte chu min tihchhiat sak la. Nangmah aia ka lo thlan zawk thil; hna, sum leh pai, midang nena inlaichinna, nawmsakna thil dang zawng zawngte pawh tihchhiat vek ka duh e. I duh zawng leh I kawngte chu ka zawng zawng ka pekna lo ni tawh zawk rawh se. I awmnaah tawh phawt chuan ka mamawh zawng zawng a awm vek si a. Lal Josia ang hian I thu ka chhiar leh hriatte hian ka nun a taka min lo thlak danglam saka min lo siamthar zel theih nan. Isua hmingin ka dil e, Amen!