Lunglei leh Lawngtlai inkar kawngpui Bualte daia leimin avangin lirthei engemaw zat an tangkhang mek.

#ZONEWS August 04, 2025: Lunglei leh Lawngtlai inkar kawngpui Bualte daia leimin avangin lirthei engemaw zat an la tangkhang mek a. Tun dinhmunah kawng a la tlang mai thei lo.

Leimin avanga tangkhang mi 100 bawr te chu Thualthu Branch YMA hmalakna in Thualthu Bazar Shed ah Inrinni zan khan eirawngbawlsak an ni a. Heng khualzin tangkhangte hi a remchan dan angin mimal inah semin an riak a. Nimin tukah Bazar shed-ah vek Branch YMA te’n tukthuan an buatsaih sak leh a ni.

Lawngtlai/Siaha lam pan tur lirthei engemawzat chu Thualthu daiah nimin chawhma atang khan an tang tan a, a hnai vaiah lei laihna khawl a awm loh avangin, heng lirthei tang motor engemawzat te hi YMA Thualthu Branch hmalakna in, nimin chawhnu atang khan nam chhuah thin an ni a. Inrinni zan thleng khan Chhimlam pan tur motor, chirhdiak a tang te chu thirtiang, suahdur leh Bawngtuthlawh etc. hmangin thenfai thin niin motor te hi namchhuah leh thin an ni.