PATHIAN THU ANGA DIN NGHEH TLATNA HIAN, KHAWVEL DAN ANGA AWM VE ZEL AIIN MIDANGTE NUNAH NGHAWNG A NEI NASA ZAWK ṬHIN.

#ZONEWS #FIANRIAL August 14, 2025:
PATHIAN THU ANGA DIN NGHEH TLATNA HIAN, KHAWVEL DAN ANGA AWM VE ZEL AIIN MIDANGTE NUNAH NGHAWNG A NEI NASA ZAWK ṬHIN.

Vawiina kan fianrial hunah chuan Daniela leh a thiante – Sadraka, Mesaka leh Abednagoa te chanchin hi ngaihtuah ang aw. Heng rawlthar rual te hi Juda mi Babulon sala tangte an ni a, Lal Nebukadnezzara rorelna hmuna Babulon finna zir tura rawn hruaite an ni. Lal chuan ama thu angin hruai tum mahsela Pathian thuah chuan an rinawm tlat a, Pathian chuan finna leh hmuingilna kawngah a hruai ta a ni tih kan hria a ni.

DANIELA LEH BABULON LAL RAWNGBAWLTUTE
Mahse Daniela chuan a rilruin lal chaw leh a uain in ṭhin te chuan intihbawlhhlawh loh a tum tlat a; chutichuan a intihbawlhhlawh loh nân tilrehte hotu chu a dîl a (Daniela 1:8).

I vela mite beisei dan che leh an duh dan che anga awm ve zel tura nawr niin i hre thin em?

Daniela 1:1-16-ah chuan, Daniela leh a thiante – Sadraka, Mesaka leh Abednagoa te chu sala man niin, Lal Nebukadnezzara rorelna hmunah hruai an ni tih kan hmu a. Ram dangah awmin, an tihdan ang titura nawr nimahsela, an rinnaah chuan an ding nghet tlat a ni.

An dinhmun angah khan awm ve ta ila engtin nge kan tih ve ang le? Kan rinnaah kan ding nghet ve ang nge, Rom-ah chuan Rom mite tihdan angin tih kan chang chawi zawk anga an tih dan angin kan ti ve mai ang?

Daniela leh a thiante hi Lal dawhkan a mi ang uain leh chaw tha ber ber an dawng a, chuti chung chuan Pathian duh dan ang ei leh in chu an thlang zawk a, thlai hring leh tui pe zawk turin an ngen a ni. An thutlukna chuan nghawng tha lo a nei theiin lal chhiahhlawhte tan pawh a hlauhthawnawm thei a, nimahsela Pathian chu an ring tlat a. Ni 10 an enchhin hnuah chuan lal chaw eite aiin an hrisel hmel ta zawk tlat mai a. An rinna leh an rin Pathian rintlak zia chu a takin a lo lang ta a ni.

Harsa viau mahsela rinnaa i din ngheh tlat a ngaihna hun leh hmunte i nunah khan a awm ve em le?

Pathian tana an inpekna chuan an hriselna mai ni lovin lal rorelna hmuna mifing leh hre ril zawk niin midangte aia danglam zawk an lo ni ta a. Pawn lam atanga nawrna karah pawh Pathian laka rinawm tlat pawimawhzia Daniela te thianho chanchin hian min zirtir a ni.

Kan nitin nunah engtin nge Pathian thu anga kan rinawm ve tlat theih ang? Midangte a tha zawnga kaihruai thei turin engtin nge hma kan lak ve ang le?

Khawvel dan anga awm tura nawrna karah pawh, Daniela te chanchin hian kan rinnaa nghet taka dingturin min tihuaisen sela. Pathianah rinna kan nghah tlat a, a thu anga kan rinawm tlat a nih chuan, kan vela miteah a tha zawngin nghawng kan nei thei dawn a, finna tak tak chu Pathian hnen atang chauha lo chhuak a ni tih kan lantir thei dawn a ni.

NGUN TAKIN INNGAIHTUAH ANG ILA!
Khawvel dan anga awm tura nawrna kan hmachhawn thinte ngaihtuah ila. Daniela leh a thiante anga kan rinnaa nghet taka kan din theihna lai tur nia kan hriatte ngaihtuah ang aw.

Kan thil tihnaah leh thutlukna siamahte, harsa viau mahsela Pathian thu anga ti turin theihtawp chhuah ang aw.

Kan vela mite a tha zawnga kan kaihhruaia rinnaah chuan nghet taka kan din tlat theihna turin Pathian hnenah chakna leh finna dilin i tawngtai ang u.

ṬAWNGṬAINA
Mahse Daniela chuan a rilruin lal chaw leh a uain in ṭhin te chuan intihbawlhhlawh loh a tum tlat a; chutichuan a intihbawlhhlawh loh nân tilrehte hotu chu a dîl a (Daniela 1:8)

Aw Lalpa, he khawvela ka awm chhunga ka tihtur dik tak leh nangman min din chhan chu ka tih zel theihna turin, ka taksa ka enkawl kawngah finna min pe la, ka nawmsakna aiin nangman min dinchhan chu a pawimawh zawk a ni tih min hriat nawn tir fo ang che. Daniela leh a thiante anga nangma tana ka taksa leh rilru ngaihtuahnate tibawlhhlawh lova, nangma finna chu a taka tawn ve theih ka duh e. Nangman min dinchhan tithei tur chuan taksa hrisel taka kan awm theihna tura kan ei leh in leh nunphungte pawh khawvel dan ang ni lova, nangma duhdana kan awm mai hi a hrisel bera a tha ber a ni tih min hriat nawn tir ang che. Ka taksa hmanga nangmah chawimawia midangte tan entawn tur hnut chhiahtu ka nih zel theih nan, Isua hmingin ka dil e, Amen!