RINNA CHU FIAHA A AWM HUNIN, PATHIAN THILTIHTHEIHNA LEH CHAKNA CHU A TAKIN A LANG CHHUAK ṬHIN.

#ZONEWS #FIANRIAL August 21, 2025:
RINNA CHU FIAHA A AWM HUNIN, PATHIAN THILTIHTHEIHNA LEH CHAKNA CHU A TAKIN A LANG CHHUAK ṬHIN.

Vawiin kan fianrial hunah chuan Daniela leh Sakeibaknei puk chungchang ngaihtuah ila. Media Lal Daria chuan Daniela finna leh rinawmna kha a ngaihlu em em a, nimahsela hotu dangte chuan itsikin Daniela chu an phiarru ta thung a. Daniela phihawh tumin, Daria chu thupek an chhuahtir ta a; Ni 30 chhung chu, lal Daria hnenah chauh lo chuan, eng pathian hnenah mah tumah an tawngtai tur a ni lo. Chutiang dan an siam a ni tih a hriat hnuah pawh, nitina a tihdan pangngaiin Daniela chuan Pathian hnena tawngtai a la chhunzawm reng tho a ni. An ram danah Lal thupek sut theih a nih tawh loh avangin, Daniela chu Sakeibaknei pukah khung a ni ta a, mak tak maiin Pathian chuan a chhanhim a, chu thilmak a taka tawngtu Lal Daria chuan an ram pumpuiah Pathian ropui zia chu a puan chhuah phah ta a ni.

DANIELA LEH SAKEIBAKNEI PUK
“Ka pathian chuan a vântirhkoh a rawn tîr a, sakeibaknei ka te a tichîp a, engmah mi tina lo ve; A mithmuhah chuan sawisel bovin ka awm a; tin, i chungah pawh aw lalber, pawi eng mah ka khawih lo ve,” a ti a. (Daniel 6:22).

I rinna kalh zawnga thil titura nawrna i tawng ve tawh em?

Daniela chuan chutiang chona chu huaisen takin a hmachhawn hmiah mai a; lal Daria hmaah chauh lo chuan ni 30 chhung chu eng pathian hnenah mah tawngtai phal a ni lo chungin, Pathian hnena tawngtai chu thulh a tum chuang der lo. A thiltihin a nghawng chhuah tur chu a hre reng chungin a rinnaah Daniela chu a ding nghet tlat a, nitin vawithum a tawngtai thin chu a chhunzawm reng tho a ni.

I rinna chu fiaha a awmin engtin nge i lo chhan let ve thin le?

Daniela fianrial hun hmang thin chu, amah phihawh tuma phiarrutute chuan remchangah hmangin lal hnenah an hek a, Daniela chu Sakeibaknei riltam tak mai pukah paih luh a ni ta a. Nimahsela, Pathian chuan Daniela chu a kalsan hauh lo. Sakeibaknei kha tichih turin A vantirhkohte a tir a, Daniela chu engmah na pakhat pawh nei lovin a rawn chhuak leh a ni. He thil thleng mak tak mai hian, Pathian thiltihtheihzia leh Amaha rinna nghattute chunga a rinawmzia a takin a lantir a ni.

Dinhmun khirh leh harsa tak ata Pathianin a lak chhuah ni che i tawng ve tawh em?

Lal Daria chuan chu thilmak tak mai a taka a hmuh takah chuan, Pathian ropuizia puang chhuakin, a lalram pumpuiah Daniela Pathian chawimawi turin thupek a chhuah ta hial a ni. Daniela rinawmna chuan amah a chhanhim chauh pawh ni lovin Pathian engkimtitheia thiltihtheihzia a takin a lan chhuahtir phah a ni. Kan nunah pawh hian, min sawichhetu leh kan hmelmate hmaah pawh kan rinna hi nghet takin dinpui thin ila, chu chuan Pathian thatna leh thiltihtheihna chu a takin midangte a hmuhtir thei dawn a ni.

Pathian venhimna chu ring tlat thei tura kan rinna chu kan tihchak zual theih nan engtin nge hma kan lak ve ang le?

NGUN TAKIN INNGAIHTUAH ILA!
Pathian kan rinna leh a bik takin harsatna emaw, vauna emaw, kan rinna ang ni lo thil titura nawr kan nih laia Pathian tana kan inpek vena nia kan hriat te ngaihtuah ila. Kan rinna anga din ngheh tlat harsa kan tihna hun leh hmunte a awm ve em le? Daniela ang hian, kan rinnaah chuan huaisen tak leh nghet taka kan din tlat theih nan, Pathian hnen atanga chakna chu i zawng zel ang thin ang u.

Pathian venhimna chu ring tlat chungin nitin bang lovin tawngtai zel ila. Pathian tana kan rinawm tlatna chu kan vela mite tan A thuhretu kan nihna hriatpuitu leh tilang chiangtuah a chang thei a ni tih kan hre reng dawn nia.

ṬAWNGṬAINA
“Ka pathian chuan a vântirhkoh a rawn tîr a, sakeibaknei ka te a tichîp a, engmah mi tina lo ve; A mithmuhah chuan sawisel bovin ka awm a; tin, i chungah pawh aw lalber, pawi eng mah ka khawih lo ve,” a ti a. (Daniel 6:22).

Aw Lalpa, I khawngaihna leh duhsakna ka chan zawng zawngte avangin lawmthu ka hrilh a che. Ka tlukna tur leh chhiatna turin midangten thang lo kam mahse, Nang chuan ka tan kawng tha zawk min siamsakin, I khawngaihna chuan min hualhim reng thin a ni tih ka hria a lawmthu ka hrilh a che. Sakeibaknei puk a awm tur ang maia hlauhnain min rawn man chang pawhin, nang chuan an kha te chu i tichih thin a. Nang chu I laka rinawm thinte veng him thintu i ni a, chu chu chatuan atana danglam lo tur a ni si a. I ta ka nih anga rinawm leh chhel taka ka chawimawi zel theih nan che, Isua hmingin ka dil e, Amen!