Saitualah RD Minister-in CM Special package hnuaia progress partner te tana orientation training buatsaihah hun a hmanpui

#ZONEWS Saitual July 25, 2025: Vawiin khan DC Conference Hall, Saitualah Rural Development Minister Prof. Lalnilawma chuan CM Special package hnuaia Bana kaih progress partner te tana orientation training buatsaihah khuallian niin hun a hmanpui a, certificate leh placard te a sem nghal bawk a ni.

He hunah hian Minister Prof. Lalnilawma chuan thu sawiin, Bana kaih progress partner te tan orientation training an nei thei chu lawmawm a tih thu a sawi a, CM Special package chu DC kaihhruaina hnuaia District hotute hmalakna leh thawhrimna avanga hlawhtling a ni, a ti. Khuallian chuan sawrkar hmasaten mipuite hmasawnna tur policy tha tak tak an lo kalpui tawh thin tih a sawi a, sawrkar thar pawhin flagship programme Bana kaih chu duangin, theih tawpa rua hmanna te siam chhoh a ni, a ti a, sawiselna kara tun hun an thleng thei chu lawmawm a tih thu a sawi bawk.

Minister chuan Handholding ‘progress partner’ tih chuan awmze thuk tak a nei tih a sawi a, scheme hrang hrangah chuan hamthatna dawngtute chu ‘beneficiaries’ tia sawi thin niin, handholding hnuaiah erawh chuan hmasawnna atana thawhpuitu ‘progress partner’ tih an ni thung tih a sawi. Progress partner tih chuan intluktlanna a lantir tih sawiin, hmasawnna atan sawrkar chuan mipuite chu thawhpuiah a sawm a ni, a ti.

Prof. Lalnilawma chuan progress partner te chu uluk taka thlan chhuah an ni tih a sawi a, sumfai tanpuina ‘grant’ te chu a hmanna tur dik taka hmang tura chahin, sawkarina a vilzui reng tur thu a sawi. Minister chuan an grant dawn te chuan an mamawh zawng zawng te a phuhru thei nghal kher lo a nih pawhin hmasawn nana hmang a, tangkai taka an hman chuan an hlawhtlin ngei a rin thu a sawi. Harsatna avanga hlawhtling ta lo an awm a nih pawhin inhriatthiamna a awm tur thu a sawi a, chutih rualin theih tawp chhuah turin Minister chuan progress partner te chu a fuih a, duhsakna a hlan nghal bawk a ni.

Vawiin orientation training thawh khatna hi Pu Lalthakima Chhangte, SDO(S)-in a kai hruai a, Saitual Bawrhsap Dr. Lalngura Tlau chuan inlawmna thu sawiin, Pi Christina Lalnunfeli chuan Bana Kaih scheme sawifiahna leh sawizauna hun a hmang a. Pu C. Christopher Lalhriatpuia, District Lead Resource Person, DIC, DRDO chuan “Introduction to Entrepreneurship & Basic Business Management” tih thupui hmangin mahni kutkawih eizawnna leh sumdawnna chungchang a sawizau a, Pu PC. Lallawmkima, Account Officer, DRDO chuan sum leh pai vawn that dan ‘Basic bookkeeping’ chungchangah zirtirna a pe bawk a ni.

Orientation thawh hnihnaah hian Saitual District-a department hrang hrang Agriculture, Horticulture, AH & Vety, Commerce & Industries, Sericulture, LRS&WC leh Fisheries hnuaia progress partner te chu an trait thlan theuhah te technical training pek an ni a, intiamkamna an sign nghal bawk a ni. Training zawhah hian CM special package atanga sum fai (grant) te chu progress partner te back account-ah thun nghal a ni.

Vawiinah vek hian Minister Prof. Lalnilawma chuan KTP General Conference 2026 neihna hmun tur Saitual Public Playground a tlawh nghal a ni.