SCHOOL EDUCATION MINISTER HOVIN SMART CLASSROOM HAWNNA HUN HMAN A NI

#ZONEWS Aizawl August 18, 2025: Vawiin khan School Education Minister Dr Vanlalthlana hovin Conference Hall School Education Complex-ah Smart Class room hawnna hun hman a ni.

He hunah hian School Education Minister Dr Vanlalthlana chuan thusawiin HDFC ten CSR Scheme hnuaiah Smart classroom 36 lai neih belhna tur an pe chu lawmawm a tih thu a sawi a, tunah hian hmalakna dangah smart classroom 220 atan tender chhuah a ni a, smart taka classroom kalpui a nih theih nan sorkarin hma a mek a, khawvel vir ruala kan vir ve theih nan hmanrua hmangin thiamna chi hrang hrang min rawn vur a, chumi uma kan kal ve loh chuan mi hnungah kan kal ang a, an neih kan awt mai ang tih a hlauhawm a, theih tawp kan chhuah a ngai a, chumi atana min puitu tur chu smart classroom hi a ni a ti.

Minister chuan zirna lamah hian tih dan hlui bakah skill lamah hian kal a ngai tawh a, mahni kut kea din theih dan kawng zawn a ngai a, zirna lamah common facility centre ang chi te din tam a ngai hle a ni a ti a. Tunlai khawvelah zirlaiten social media an hmang nasa tawh a, youtube ah te video eng eng emaw te an en a, tangkai taka hman theih ni si, hlawkna tur awm vak lovah hun tam tak paihna ni bawk si a ni a, zirtirtute pawhin Youtube te hi tangkai taka hman a ngai a, skills lamah hian engnge naupang tan tha ang tih ena ngaihtuah a ngai a, hna sang tak tak kan enpui rualin hna sang tak ni lem lova ngaih hlawhtlinna tam tak awm theihna ni si hi enpui a ngai a, chu lam chu naupangte hrilh tam a ngai a ni a ti a. Minister chuan College kal ve hrim hrim ai chuan skill lama kal a ngai tawh a ni a ti bawk.

Smart classroom hawnna inkhawmah hian Pu John Varte Cluster Head HDFC chuan mipui tana an bank luanchhuahna hnathawh chi hrang hrang a sawi a, HDFC hian India ram pumah Branch 9499 a nei mek a, veng 4153 ah a in zar pharh tawh a, ATM booth 21251 a nei mek a, Mizoramah hian Branch 11 an nei a, Aizawl-ah Branch 5, Lunglei, Serchhip, Lawngtlai, Siaha, Kolasib leh Champhai-ah te Branch pakhat theuh an nei tih a sawi a, HDFC ten CSR scheme hnuaiah hmasawnna programme an kalpui zingah chuan tuna smart classroom hi education lama hmalakna a ni a ti a. Mipui tana an thawh zingah payment gateway hrang hrang heng tui bill leh electric bill pekna te, zirna in thenkhat te fee pekna ang chi te hi an buaipui tih a sawi a bawk.

He Smart classroom hawnna inkhawm hi Pu David Lalthantluanga Special Secretary School Education-in a kaihruai a, Smartboard pekna school ten online-in an zawm bawk a, heng school te hian an hman tangkai dan leh hlawkpui dan te an sawi bawk. He hunah hian  HDFC Bank a thawktute leh Samagra Shiksha-a thawkte an tel a ni.