Serchhip DC in Serchhipa school hrang hranga civil service lama kal tum (aspirants) zirlaite a kawm

#ZONEWS Serchhip August 05, 2025: Vawiin khan Serchhip DC Pu Paul L.Khuma chuan DC Meeting Hall-ah Serchhip School hrang hranga Civil Service lama kal tum (aspirants) zirlaite a kawm.

He inkawmnaah hian DC chuan zirlaiten Civil Service-a luh an tumna kawnga châkna leh tumna tak tak an neih theihna atana he hun hi buatsaih a nih thu a sawi a. Serchhip chu India rama ziak leh chhiar thiam tamna ber a nih avangin zirlaite laka an beiseina pawh a sâng hle tih sawiin, phûrna (inspiration) neihna tur hian lian lua leh te lua a awm lo a, kan tumna lama min pawt kal theitu a nih chuan eng pawh a tha vek a ni, a ti.

SDC Dr. C.Vanlalchhanhimi chuan powerpoint presentation hmangin Civil Service-a luh dan kalkawng leh an hnathawh tlangpui a sawi a, zirlaite chuan Civil Service-a luh an tum chhante an sawi bakah an thil hriatduh hrang hrangte an zawt bawk.

He hunah hian Serchhipa School pathum – Brilliant HSS, Presbyterian English School leh Marian High School atangin zirlai 20 an tel bakah Serchhipa MCS Officer te, DIPRO leh chanchinbumite an tel a ni.