Serchhipah India Independence Day vawi 79-na ropui taka lawm a ni

#ZONEWS Serchhip August 15, 2025: Vawiin khan Serchhip District chhung hmun hrang hrangah India zalenna ni vawi 79 na lawm a ni a. A lawmna pui ber chu Serchhip Sports Complex ah neih niin khuallian Supply Minister Pu B.Lalchhanzova chuan tukin dar 10 khan hnam puanzar a pawt pharh a ni.

Pu B Lalchhanzova chuan The Mizoram Bana Kaih (Handholding) Scheme hnuaiah Serchhip District chuan sawhthing lei leh hralh hna tha takin a kalpui a; a thawhkhatnaah quintal 8845, a thawhhnihnaah quintal 55,676 lai loneitute hnen atanga lei sak an ni, a ti a. He scheme hnuaiah vek hian tun hnai lawkah Department hrang hrang kaltlangin CM Special Package mi 200 bawr velin an dawng a, heng an tanpuina dawn te hi tangkai taka hmang turin a fuih a ni.

Khuallian chuan Serchhip District-in kawng hrang hranga hmasawnna a hmu chho zel  chu lawmawm a ti a. Mizorama a hmasa ber leh awmchhun ni turin “Vantlang Viltu” (Citizen’s Eye) Mobile App  – rukruk, kangmei, leimin leh buaina leh harsatna dangte, thuneitute hnena a thlalak nena an report zung zungna tur, Serchhip DC hmalaknaa siam a ni chu chhuanawm a tih thu a sawi a. Hei bakah hian Government Online Excellence Award, Tourism buatsaih District te inelna – Tour Itinerary Creation Competition leh  Storytelling Competition-ah te lawmman pakhatna an dawng a; PM Vishwakarma Scheme kalpu tha ber an ni a; Self Help Group (SHG) North East Zone Cluster Level Federation sang chuang awm zingah Vantawng Cluster Level Federation ten lawmman pakhatna an dawng a; Green Mizoram Day-ah Serchhip District chuan State level-ah lawmman pahnihna a dawng a; UD&PA buatsaih District te inelna Beautification Competition-ah leh Mizoram Cleanliness Competition-2024 ah Serchhip Town chuan lawmman pathumna a dawng bawk tih sawiin Pu B Lalchhanzova chuan Serchhip District mipuite a lawmpui a. District chhuanawm leh entawntlak ni zel tura theihtawp chhuah turin a fuih a ni.

Serchhip District Civil Supplies Office hnuaiah AAY leh PHH chhungkuate hnenah buhfai a thlawna sem tan niin kumin June thla khan thla 3 quota pek an ni, Minister chuan a ti a. Ration Card thar – Mizoram State Special Ration Package (MSSRP) chu December 2024 khan hman tan niin  buhfai kg-ah Rs.20 hisapin a khulh theih a, Serchhip tan Card 1500 pek a ni tih a sawi.   Khawlailung leh Serchhip Town Area ah LPG home delivery hlawhtling taka kalpui a ni chu lawmawm a tih thu leh furpui atan Monsoon Stock kudam 6-ah dahkhawl a nih thu Supply Minister chuan a sawi bawk.

Revenue changtu ni bawk Minister Pu B Lalchhanzova chuan Serchhip District-ah Land Records Digitization tluang taka kalpuiin zaah za (20,491 land records) computer-ah thun a ni tawh te, DILRMP (Digital India Land Records Modernization Programme) hlawhtling taka kalpuiin map-a ram thun runpui (GIS map update) pawh ngawrh taka kalpui mek a ni te chu lawmawm a tih thu a sawi a. Revenue Department hmalaknain nakin lawkah chuan mi tinin kan ram chungchang awlsam takin internet-ah kan hmetchhuak zung zung thei tawh dawn a, chhiah-te pawh internet hmanga Online-a pek ni tawhin thenawm ram in-nek buai, ram inthuah, ramri hriat chian loh, kan application thehluh chinchang hriat loh leh buaina dang tam tak te chu tih bovin a la awm thuai dawn a ni,a  ti.

Serchhipa Independence Day lawmna programme-ah hian parade contingent 17 an awm a – unarmed contingent 6, school contingent 11 leh band party pakhat an awm a ni. Unarmed Contingent ti tha ber lawmman dawngtu chu Government Serchhip College NCC Army Wing an ni a, Government Serchhip College NCC Airwing ten lawmman pahnihna an dawng a, lawmman pathumna dawngtu chu Marian High School NCC te an ni. School Contingent te zingah pakhatna lawmman dawngtu chu Presbyterian English School High School Section an ni a, pahnihna Presbyterian English School Middle Section niin Government Serchhip Higher Secondary School ten lawmman pathumna an dawng a ni.

Stop Diarrhoea Campaign puala High School leh Higher Secondary School te flyer/poster siama inelna lawmman pakhatna dawngtu Zodinpuiin Class X Govt JM High School, lawmman pahnihna dawngtu Sanglianchhungi Class XI Govt Hr.Sec.School leh lawmman pathumna dawngtu Jacob Rodinthara Class XII Chhiahtlang Senior Secondary School te hnenah khuallian hian lawmman a sem a. Hei bakah hian Independence Day puala Sports Discipline hrang hranga tournament buatsaiha tithate hnenah Pu B Lalchhanzova hian lawmman a sem nghal bawk a ni.

Independence Day 2025, Serchhipa Khuallian Minister Pu B. Lalchhanzova thusawi

Thian duhtakte u,

Vawiin India Independence Day vawi 79-na lawmna inkhawmah chanvo ropui tak ka chang hi ka lawm em em a; Serchhip District mipuite, in zavaiin chibai ka buk a che u.

Kum zahnih bawr vel zet Kumpinu nghawngkawl bata, a thuhnuaia India ram a kun hnuah, kum 1947 August ni 15 khan zalenna famkim a lo hmu ta a. Kum tina he ni ropui tak kan lawm apiang hian kan ram zalenna sualtute inpekna hre reng ila, an inhlanna zarzoin keini thangtharte hian beiseina kawl eng kan lo hmu ta a ni tih i theihnghilh lo ang u.

Vawiinah hian Serchhip District chhunga sawrkar hmalakna langsar zual tlem han sawi ila:

Serchhip DC Office chuan August ni 1, 2024 atang khan digital file tracking system hmang tanin file tinah qr code bel a ni a; file awmna chin awlsam taka chhui theih niin hnathawh a ti sawt hle. Serchhip District chuan Government Online Excellence Award te, Tourism buatsaih District te inelna – Tour Itinerary Creation Competition leh  Storytelling Competition-ah te lawmman pakhatna a dawng a. UD&PA buatsaih District te inelna Beautification Competition-ah lawmman pathumna a dawng bawk a. Bawrhsap kaihhruai Beautification Committee chuan Serchhip khawpui chei hna uar takin a kalpui mek a ni.  Mizorama a hmasa ber leh awm chhun ni turin Serchhip DC office chuan Vantlang Viltu mobile app a siam a. He app hmang hian Serchhip District mipuiten dan bawhchhiatna, vuivaina leh thil pawimawh an thlen duhte hmun leh hmunah an phone hmangin sawrkarah an thlen  zung zung thei a ni.  

Land Revenue & Settlement Department chuan Ram Pass 125 pe chhuakin Serchhip khawpuiin a mamawh em em Filling Station din belhna tur land lease pawh a pe chhuak a. Serchhip District Sport Complex ram Land Lease atan sawrkarin recommendation a tichhuak bawk a. Serchhip Headquarters Land Committee chuan rambuai case sawm (10)  a chingfel a.  Land Records Digitization kalpuiin zaah za (20,491 land records) computer-ah thun a ni a. DILRMP (Digital India Land Records Modernization Programme) hlawhtling taka kalpuiin map-a ram thun runpui (GIS map update) pawh ngawrh taka kalpui mek a ni a. Revenue Department hmalaknain nakin lawkah chuan mi tinin kan ram chungchang awlsam takin internet-ah kan hmetchhuak zung zung thei tawh dawn a, chhiah-te pawh internet hmanga Online-a pek ni tawhin thenawm ram in-nek buai, ram inthuah, ramri hriat chian loh, kan application thehluh chinchang hriat loh leh buaina dang tam tak te chu tih bovin a la awm thuai dawn a ni. 

Serchhip District Civil Supplies Office hnuaiah retailer 89 awmin, chhungkaw 18,093-te ration pek thin an ni a.  AAY leh PHH chhungkuate hnenah buhfai a thlawna sem tan niin kumin June thla khan thla 3 quota pek an ni a. Ration chi thar – Mizoram State Special Ration Package (MSSRP) chu December 2024 khan hman tan niin  buhfai kg-ah Rs.20 hisapin a lei theih a, Serchhip tan Card 1500 pek an ni.  Khawlailung leh Serchhip Town Area ah LPG home delivery hlawhtling taka kalpui a ni a. Ei leh bar tlachham lova furpui kan paltlang theih nan Monsoon Stock kudam 6-ah dahkhawl a ni bawk.

Serchhip District Police ten khawtlang ralmuang siam turin theihtawp an chhuah a. Chhun leh zanah, chawlhni pawh awl lovin  ngawrh takin an duty thin. Nikum Independence Day leh kumin inkarah thubuai 144 ziahluh a ni a, pawikhawihtu 197 an man a.  ND&P hnuaiah thubuai pasarih (7) ziahluh a ni a. Ruihhlo heroin No. 4 gram 405.05, cheng nuai 10.35 man hu leh Ganja kg 3.120, cheng nuai 7.15 man hu an man a. MLP Act, 2019 hnuaiah thubuai panga (5) ziah luh a ni a. Rakzu liter 1286 (Rs. 6,43,000) man niin mi pasarih (7) Court ah thawn an ni. 

The Mizoram Bana Kaih (Handholding) Scheme hnuaiah Serchhip District chhungah DC kaihhruaiin DAMC chuan Sawhthing lei leh hralh hna a buaipui a. A thawhkhatnaah quintal 8845, a thawhhnihnaah quintal 54,980, loneitute hnen atangin lei a ni. Serchhip District ah hian Sawhthing hralh tam ber hian quintal 245.72 zet a hralh a ni. Agriculture Department chuan Bana Kaih (Hand holding) Scheme hnuaiah vek hian CM Special Package atangin mi 14 hnenah cheng nuai 12 an pe chhuak a. PM Kissan hnuaiah kuthnathawk chhungkua 6750 ten tanpuina an dawn bakah scheme hrang hrang an kalpui hmangin loneitute mamawh thlai chi engemawzat an sem a. Digital crop Survey leh Aerial drone Survey hi Mizoram chhungah Serchhip District chuan a kalpui hmasa ber a, farmer 388 ram teh fel tawh a ni.

AH&Vety Department chuan Handholding Scheme Progress Partner (Pilot Project) atan mi panga a thlang a.  CM Special Package ah mi 127 thlang chhuakin, cheng nuai 111.60 sem a ni. Kum 2024 chhungin ASF hri leng avanga vawk thi 3499 leh vawk  suat 7091 an awm a; District Disaster in vawk pakhatah cheng 4,000 zel zangnadawmna pe turin hma an la mek a ni. Lungkawlha Mithun Multiplication Farm chu April ni 11, 2025 khan AH & Vety Minister Pu.C.Lalsawivunga’n a hawng a. Thenzawlah Mega Egg Production Farm leh Mithun Conservation Centre te chu May ni 8, 2025 khan Mizoram Chief Minister Pu.Lalduhoma’n a hawng bawk a ni.

Horticulture chuan MIDH Scheme hnuaiah kum 2024–2025 chhungin thlai chi engemawzat an sem bakah loneitute tan tanky leh greenhouse an siam a.  Dragon fruit quintal 1,480 leh serthlum quintal 1,178 tharchhuah a ni. RKVY-PDMC hnuaiah loneitute tan thlai tui pekna vuah sak bakah pipe engemawzat an semchhuak a. Kumin July thleng khan Pa (Mushroom) chi kg 330  siamchhuah a ni a; Serchhip , Champhai leh Lunglei District ah te hralhchuah a ni. 

Fisheries chuan PMMSY hnuaiah mi 80 hnenah sangha dil thar laihna tur an pe a.  Mi 40 hnenah sangha note khawi lenna dil thar siamna an pe a. Sangha dil neitute tan sangha note 8,64,000 an sem chhuak a. Cyclone Remal in a tihchhiat sangha dil neitu mi 124 te hnenah tanpuina sumfai cheng nuai 26.31 an pe bawk.  

District Sericulture Office, Serchhip chuan Silk Samgra-2 project hnuaiah beneficiary 18 neiin Nauthak pangngang an khawi a. The Mizoram Bana Kaih (Handholding) hnuaiah CM Special package atan mi 6 thlan niin an account- ah pawisa thun fel tawh a ni bawk.

Irrigation & Water Resources Department chuan Thenzawl, Hmuntha, Serchhip, Khawlailung leh North Vanlaiphaiah Project hlawhtling takin an thawk zo tawh a. Cyclone Remal-in loneitute tui kawng a tihchhiat siamthat nan Serchhipah Project 24 an thawk bawk a ni.

Kum 2024-2025 chhungin PWD Serchhip Division chuan kawngpui km 11 a thui Formation Cutting an zo a, km 83 an blacktop a, km 5 a thui concrete pavement an siam a, culvert hmun 6 ah an siam a, lei min leh kawng bal ven nan retaining wall hi hmun hrang hrangah belhkhawmin meter 349 a thui rem zawh a ni bawk.

Power & Electricity Department chuan Thenzawl 10MW Solar Power Plant an siam zo tawh a,  kumin March ni 1 atang khan he Plant peng thenkhat (eastern side) atangin kawlphetha an siam chhuak tan a ni. New Serchhip Luiralmawi leh Thenzawl Venglaiah te 100kVA Distribution Transformer an bun fel bawk a ni.

PHE chuan JJM hnuaiah Hmawngkawn, Khawlailung, Keitum, E.Lungdar, Leng leh Sailulakah khuate bakah, NABARD hnuaiah N.Mualcheng tuilak hna a thawk zo tawh a. NABARD hnuaiah Thentlang Solar hmanga tuilak zawhfel tep a ni a. AMRUT 2.0 hnuaiah Serchhip leh Thenzawl tuilakna tihchangtlun hna thawh mek a ni bawk. New Serchhip Lungrual hmunah Solid Waste Management Centre (SWMC) din niin August ni 4 atang khan thingtlang khuaah bawlhhlawlh (Tawihtheilo) lakkhawm leh sawngbawl hna chu Green Herd Pvt. Ltd. te nen tangtlanga buaipui tan a ni a. Kum 1 kalta chhung khan khawpuiah tui connection 250 leh Thingtlangah 4525  pek fel a ni bawk.

February ni 17, 2025 khan Serchhip District Hospital-ah Ultra Sound khawl thar dah a ni a. Kumin July 5 khan Dialysis khawl thar pahnih dah belh a ni bawk. Khum 100 awmna tur District Hospital Building sak chhunzawm zel a ni a.  NextGen eHospital chu kumin July 8 atang khan hman tan a ni. Damlo awmpuitute riahna tur shelter sak mek a ni a. General Pool Accomodation sak mek a ni bawk.

Serchhip District chhunga PHC 4 te chuan National QAS Certificate an dawng a, State Level Certificate dawng PHC leh CHC pakhat ve ve an awm bawk. Hrangturzo Bialtu MLA, Adviser to CM Pu Lalmuanpuia Punte chuan East Lungdar PHC leh North Vanlaiphai PHC ah te X-Ray khawl a pe a, Khawlailung PHC ah Ambulance thar pakhat a pe bawk. Hmuntha, Khawbel leh Kanghmun South ah te Health & Wellness Centre Building thar sak a ni a. Serchhip District chhunga khaw 9 te chu TB Free Village ah puan an ni a, kum hnih chhung, a zawna TB Free Village ni thei Hmuntha khua chuan Silver an dawng thung.

Thenzawl Forest Division chuan meikawng Km  42.9 an siamthar a. Kangmei chungchanga  Awareness Campaign chu Range tinah neih niin Serchhip District huamchhunga kangmei ven kawnga khaw tithate lawmpuina hlan an ni a;  1 na- Leng Khua , 2 na- Zote ‘S’ leh 3 na- Ngentiang ten lawmman an dawng.  Kumin Green Mizoram Day-ah khan Serchhip District chuan kangmei ven kawngah, State level ah lawmman 2 na a dawng a. Serchhip Sub- Hqrs. YMA te chuan ramngaw leh nungcha humhalh kawnga an hnathawh that lawmman, Green Mizoram Award an dawng bawk. 

The Mizoram Bana Kaih (Handholding) Scheme hnuaiah Serchhip Commerce & Industries Department chuan CM Special Package atangin Progress Partner mi 135 an thlang a, an sum dawn turte pawh pek kim vek tawh an ni. Serchhip District hi Mizoram pumah  PM Vishwakarma Scheme  kalpui tha ber an ni.

Land Resources, Soil & Water Conservation Department chuan RKVY hnuaiah Lungchhuan khuaah Terrace 31 an lai a, Check Dam engemawzat an siam a, tlang ramah Stagger Trenching laih a ni. Community Water Tank leh Individual Water Tank engemaw zat siam a ni a. Rubber huan siamte tan Saphai Zauah Link Road Km 3 laih sak an ni.  The Mizoram  Bana Kaih (Handholding) Scheme hnuaiah Rubber Hectare 20 a zauah  hma lak a ni dawn a. Bana Kaih hnuaiah vek hian mi 10 ten CM Special Package atangin cheng 80,000 theuh an dawng bawk.

Serchhip District-ah MGNREGS hnuaiah kumin chhungin ni 32 inhlawhna siam tawh niin, mipui inhlawhna atan cheng nuai 1216.19 sen a ni. Serchhip District MzSRLM hnuaia SHG 801 te sum puk kual tur hi sawrkarin cheng vaibelchhe 13.44 a pe tawha, heng atang hian chhungkaw tam takin eizawnna an neih phah a ni. SHG member zingah cheng nuai 1 chunglam la lut (Lakpati Didi) pawh chhungkaw 856 an lo tling ta reng mai.  North East zone Cluster Level Federation sang chuang zingah Serchhip District ‘Vantawng Cluster Level Federation’ chu a titha ber niin lawmman pakhatna – Atmanirbhar Sangathan Award 2024 an dawng a, Independence Day hmang tur leh lawmman dawng turin Delhi khawpuiah an thang mek a ni.

Sawrkar kum 2024-25 chhungin E Lungdar ICDS Project hnuaiah Anganwadi Centre 4 sak that a ni a,  Centre 22  thuam that a ni a, Centre 34 te chu Rural Development nena tangkawpin sak thar leh thuam that tura hmalak mek a ni. Serchhip ICDS Project hnuaiah kum 2025-26 atan Shaksham Angnawadi atangin Centre upgrade tur 21 a awm mek a, Rural Develoment nena tangkawpin Anganwadi Centre 28 sak thar tura hmalak mek a ni. Article 275(1) kaltlangin Centre 2 sak thar a ni a, WCD Dept kaltlangin Centre 1 sak that a ni bawk. Anganwadi Centre-a inenkawlna chi hrang hrangte hi digitize vek a ni tawh a. Aadhar Enrollment leh Facial Recognition Drive kalpui  niin E Lungdar ICDS Project in 86%, Serchhip ICDS Project in 92% an zo tawh a ni.  

DCPU chuan Serchhip District ah kum 2024-2025 chhungin naupang dinhmun harsa zualte chhawmdawlna Sponsorship chu naupang 110 hnenah an pe a. Naupang, dan kalha che mi 20 te chungthu Juvenile Justice Board (JJB) in a relsak a. Naupang a bika enkawl leh venhim ngai mi 103 chungthu Child Welfare Committee (CWC) in a ngaihtuah bawk. 

Samagra Shiksha hnuaiah school naupang 4163 te hnenah text book a thlawna sem a ni a, Sawkar School naupang 3100 te hnenah uniform man pek chhuah niin,  school 142-a Zirlai 7097-te hnenah Chawchhun a thlawna pek mek a ni. Rualbanlo naupang  40 hnenah transport allowance,  rualbanlo naupang 6 hnenah escort allowance  leh rualbanlo hmeichhe naupang 56 hnenah girls stipend  pek an ni bawk.. ICT and Digital Initiatives chu Elementary School pakuaah kalpui mek a ni a. I.T based teaching awlsam taka neih theihna turin Flat panel board Secondary School 18 ah pek an ni.

UD&PA Department kaltlangin PMAY Housing for All (Urban) mi 1694 in an dawng tawh a. March 2025 atang khan kal pui tan leh niin Serchhip District tan 83 bituk a ni a, a dawngtu turte hi enfiah (verify) vek tawh an ni. Mizoram Cleanliness Competition-2024 ah Serchhip Town chuan lawmman pathumna a dawng a. Swachh Bharat Mission (Urban) 2.0 hnuaiah Vantlang Inthiarna (Aspirational Public Toilet) New Serchhip Venglaiah sak mek a ni. Amrut 2.0 hnuaiah Serchhip Darnam Tuikhur, Thenzawl Khurpui, New Serchhip Venglai Tuikhur te thawmthat hna thawh zawh tawh niin,  AMRUT Mitra hnuaiah  “Women for Trees” Campaign neih a ni a; Serchhip Town chhung hmun hrang hrangah thingtiak 120 phun a ni. Solid Waste Management Centre sakna turin Serchhip, Thenzawl leh North Vanlaiphai tan Tender chhuah a ni tawh a. Kumin August ni 4 atang khan Serchhipah Bawlhhlawh thliarhran leh sawngbawl a taka kalpui tan a ni a. UD&PA leh Green Herd SP tangkawp chuan New Serchhip North leh South VC area chu bul tan nan pilot project angin a kalpui a, Serchhip khawpui pumpuiah kalpui chhoh zel tum a ni bawk.

Zirna a ni emaw, eizawnna a ni emaw, hmasawnna ruhrel din kawngah te leh hriselna lamah pawh ni se,  sawrkar hmalakna zawng zawng – scheme tin leh policy tinrengte hi chhungkua leh mimal tinte khawsak chawikanna tur a ni tih hre reng ila. Heng hmalaknate hi mipuiten kan thlawp tlat a, sawrkar nen pheikhai ruala ke kan pen phawt chuan, tuna mite leh nakina thangthar lo la awm zel tur ten kan chhawr tangkai dawn a ni tih hria ila. Vawiin ni ropui takah hian kan zavaia kan ram leh hnam hmasawnna atana inhlanthar theuh turin ka sawm a che u.

In zavaia chungah lawmthu ka sawi a, Independence Day chibai ka buk nawn leh a che u.

Ka lawm e.