Sports & Youth Minister in National Youth Icon a thlan Grace-i lawmpui

#ZONEWS Aizawl, October 8, 2025 : Vawiin chawhnu khan Ministry of Youth Affairs & Sports-in Viksit Bharat Yuva Connect hnuaia National Youth Icon atana a thlan, Grace Lalrinpari Hauzel D/o Lalsangzela Hauzel, Khatla chu Pu Lalnghinglova Hmar, Minister of State, Sports & Youth Services Department chuan MINECO-a a office-ah lawmpuina hun a hmanpui.

Pu Lalnghinglova chuan, “Grace-i hi a thawhrah avangin National Youth Icon nihna hi phu taka chang thei a ni a, ka lawmpui takzet a ni. A thlangtu pawh Ministry of Youth Affairs & Sports a ni a, a bul ṭanna hi helama Sports & Youth Services Department-in a lo buaipui a nih avangin keini lam pawhin kan intitatu viau a ni.”

“Sports Department lam chu a lo puitu leh buaipuitu kan ni mai a, mi 12 kan tirh chhuah zingah hetiang dinhmun thleng a, chawimawina dawng an awm hi a lawmawm a, ram pum huapin Mizo ṭhalai a chawimawi hle a ni,” tiin a sawi.

Vikshit Bharat National Youth Icon hi India-in kum 2047-a ram hmasawn (developed nation) zinga chhiar tel nih a tumna kawnga Viksit Bharat Yuva Connect hnuaia an hmatheh tura palai nihna a ni a. Grace-i hi January, 2025-a Mizoram aiawha Young Leaders Dialogue, New Delhi-a kal zinga mi niin a kalte atanga ram pum huapa tiṭha thlan chhuahah a tel a; India Prime Minister hmaa presentation nei a, lunch eipui tur mi pahnih thlan chhuah zingah a tel nghe nghe a ni.

Pachhunga University College-a Department of History 5th Semester zirlai Grace-i chuan SYS Department-in kawng engkima an buaipuinaah lawmthu a sawi a, “Youth Icon nihna hi lawmman a ni lova, mawhphurhna a ni a. Mizoram chauh ni lo, India ram thalaite aiawh leh hmatheh ni tura mawhphurhna a ni,” a ti.

Department aiawha thusawitu SYS Director H Lalhmingthanga chuan, Mizoram atanga Young Leaders Connect-a tel tur buaipui an nih dan leh an hmalak dan report a pe a, chumi zinga India huapa Icon nih tling Mizo nula a lo chhuak chhuanawm a tih thu leh Department pumin an lawmpui thu a sawi.

Vawiin lawmpuina hunah hian Sports & Youth Services Department Secretary Pu V Lalsangliana hoin Department hotute bakah Grace-i nu leh pate an tel a ni.