State Level Social Justice Assembly buatsaih a ni

#ZONEWS July 17, 2025: Vawiin chawhma khan Secretariat Conference Hall-II, MINECO-ah Pu Lalnunhlua, Additional Secretary, Social Welfare, Women and Child Development Department kaihhruainain State Level Social Justice Assembly neih a ni.

Chairman chuan kalkhawmte lawmna thu sawiin kalkhawmte inhmelhriattirna neih zui a ni. Pi C. Laltleipuii, Director, Social Audit Unit, Mizoram chuan social audit awmzia leh a pawimawhna, a tangkaina leh Ministry of Social Justice & Empowerment-in a ngaih pawimawh thu te a sawi a. Social Audit Unit atangin Powerpoint Presentation hmangin Champhai leh Lungleia Home leh Centre hrang hrang – AVYAY scheme hnuaia IPSrC te, NAPDDR hnuaia ODIC, IRCA leh WADA kalpui a nih dana social audit neih zawh tak chungchanga hmuhchhuah leh enfel ngaite tarlan a ni. District Assembly-a thutlukna lo awm tawh te chu a tha tawk em tih leh pawmpui theih a ni em tih te sawi ho a ni bawk.

He assembly-ah hian Social Welfare, Women & Child Development Department Director, Pi Lalhriatzuali, IAS bakah Department pahnih officials te, NGOs leh Home hrang hrang enkawltute an tel a. He assembly hi State Social Welfare Department leh Social Audit Unit, Mizoram teangkawpin an buatsaih a ni.