Tun dinhmunah Mizoramah Covid hri kai mi 4 an awm mek a, kuminah Covid hri kai mi 11 an awm tawh a, an zinga 7-te chu enkawl dam an ni tawh.

#ZONEWS July 14, 2025: Tun dinhmunah Mizoramah Covid hri kai mi 4 an awm mek a, kuminah Covid hri kai mi 11 an awm tawh a, an zinga 7-te chu enkawl dam an ni tawh.

Health & family welfare hnuai a integrated disease surveillance programme (IDSP) thuneitute sawi danin Ningani khan Covid hri kai ni a rinhlelh mi 7 an endik zinga 1 chuan hri a kai tih hmuhchhuah a ni a, Zirtawpni khan mi 5 an endik zinga 2 in an kai tih hmuhchhuah leh niin nimin khan hri kai pakhat hmuchhuah leh a ni.

Covid hri kaite hi Aizawl district ami vek an ni a. Hri kai tih lang chhuak nasa an awm lova, damlo na tak leh enkawl zui ngai lutuk an awm bawk lo niin an sawi. Mizoramah hian kumina Covid hmuhchhuah leh hmasak ber chu May thla laihawla mi 2 hmuhchhuahte kha an ni a. June thla chho khan hmuhchhuah leh an awm bawk a, vawiinah khan Covid inrinhlelh avanga thisen endik an awm lo niin IDSP hotute chuan an sawi.

Covid hri len vanglai, kum 2020 March thla chawhnu lam atanga intan kha nikumah kha chuan a zia-awm hle tawh a. Mizoramah chuan nikum chhung khan Covid hri kai mi 74 awmin a, thihpui n an awm lova, October thla atanga kumin May thla laihawl thleng khan hri kai hmuhchhuah an awm lo ani. Covid hri leng avang khan Mizoramah mi 734-in an thih phah a, kum 2021 kha thihpui tam ber kum niin mi 538 an thi a ni.

Mizoramah vawiin thleng hian Covid hri kai leh kai lo sample nuai 19, sing 9, sang 7 leh 739 endik a ni tawh a, an zinga mi nuai 2, sing 3, sang 9 leh 646-te chuan hri an kai tih hmuhchhuah a ni a, mi 734-in thihpui-in mi nuai 2, sing 3, sang 8 leh 908 te chu an dam chhuak leh a ni.

#zonews #covid19 #covid #tualchhung #mizoram