Lungleiah Janjatiya Gaurav Diwas 2025 pualin hun hman a ni

#ZONEWS Lunglei November 14, 2025: India ramin zalenna a hmuh theih nana tribal hruaitu thawh hlawk tak, Bhagwan Birsa Munda pian champha phak vawi 150-na pualin vawiin khan Lunglei District Bawrhsap Pisa huaihawtin Lunglei DC Conference Hall-ah “Janjatiya Gaurav Diwas (JJGD) – Tribal Pride Day” lawm a ni.

He hunah hian ram leh hnam zalenna atana thawktu hruaitu ropui pahnih – Bhagwan Birsa Munda leh Lalnu Ropuiliani te chawimawina leh hriat rengna atan an lim siam niin, Lunglei District Bawrhsap Pi Navneet Mann, Additional DC Pi Rochuangkimi Khenglawt leh Sub-DC Pi Lalnunchhani Hnamte te’n zahna pangpar an hlan a. Bawrhsap Pi Navneet Mann chuan Lalnu Ropuiliani chanchin sawiin, a huaisenna te, hmahruaitu a nihna leh hmeichhe hruaitu ṭha a nihna te chu chhinchhiah leh entawn tlak, Mizote awm chhunga hriat reng tawh tur a nih thu a sawi a. Ministry of Tribal Affairs (MoTA) hnuaiah hnam hnuaihnung zawk (tribal)-te tan hma lakna hrang hrang – DAJGUA, Adi Karmayogi leh Janjatiya Gaurav Varsh (JJGV) te kalpui a nih thu sawiin, India rama cheng zawng zawng huap zo hmasawnna atana hma lakna a nih thu a sawi.

He hun hi Lunglei SDC Pi Lalnunchhani Hnamte chuan kaihruaiin, Janjatiya Gaurav Diwas hun hman chhan a sawi fiah a. Janjatiya Gaurav Varsh Pakhwada (JJGVP) 2025 pualin November ni 1 – 15, 2025 inkar chhungin lemziak intihsiak, hnam rimawi hmanraw tum, hriselna endikna leh zai, lam leh thuam hmanga hnam ziarang tar lanna hun chi hrang hrang buatsaih a nih thu a sawi.

He hunah hian mahni ram leh hnam chhan nana huaisen taka Sapho lo do lettu leh thih thlenga ṭang ngam, Mizo lalnu ropui, Lalnu Ropuiliani thlahte hnenah chawimawina thuziak hlan a ni a. Lalnu Ropuiliani tupa Pu Sailoliana (Rahsi Veng, Lunglei) chuan Lalnu Ropuiliani chanchin, British-ho a do tlat dan leh a tlawm duh loh avanga tan ina a hun tawp a hman dan te sawiin, Lalnu Ropuiliani chawimawina hun an buatsaih avangin District thuneitute chungah lawm thu a sawi.

JJGVP puala intihsiakna lawmman sem zui niin, PM SHRI School Jawahar Navodaya Vidyalaya (JNV) leh Kendriya Vidyalaya (KV)-a Painting Competition buatsaiha ti ṭha pathum hnenah lawmman pawisa fai leh thuziak hlan an ni a. Traditional Musical Instrument Performance buatsaihtu Ekalavya Model Residential School (EMRS) hnenah lawm thu sawina thuziak (Certificate of Appreciation) hlan a ni bawk.

Painting Competition-a lawmman dawngtute chu:

I. Kendriya Vidyalaya:

1. 1st Prize – Jashika Kumari

2. 2nd Prize – Prety Molsom

3. 3rd Prize – Poorvi Sharma

II. PM SHRI School JNV:

1. 1st Prize – Dharoj Chakma

2. 2nd Prize – Elvis Lalhruaizela

3. 3rd Prize – Sumoti