VAIVAKAWN VENGA KHUAREL CHHIATNA TUARTUTE HNENAH TANPUINA PEK AN NI

#ZONEWS Aizawl July 25, 2025: Vawiin khan Mission Foundation Movement chuan Aizawl, Vaivakawn venga khuarel chhiatna avanga chhiat tawk leh chhawmdawl ngai, chhungkaw 35 hnenah Alu, buhfai, tel leh Sintex an sem. He an hmalakna hi HT Parekh Foundation Mumbai, CSR kaltlanga neih niin Minister leh Bialtu MLA ni bawk Pu Lalnghinglova hmar-in hun hi a hmanpui a ni.

Minister chuan “Mizoram sawrkar sum la hek lo zawnga CSR hmang tangkai thei pawl an awm thin chu lawmawm a tih thu sawiin, hetiang pawl hi lo pung zel se” a ti a, MFM in kawng hrang hrang hmanga central sawrkar, CSR leh foreign project hmanga hna an thawk thin chu ropui a tih thu sawiin an hmalakna chhawrtu hi mi sing chuang an awm tawh a rin thu a sawi a. Mizo ten CSR leh foreign fund-te hai chhuah kawngah hma kan sawn deuh deuh a tul thu sawiin kan la haichhuah that theih tawk loh thin nachhan chu document kan neih that tawk loh thin vang niin nasa lehzuala hai chhuak thei turin document vawn that kawngah tan lak a ngai a ni a ti bawk.

Pu Lalramchuanzela, Executive Director, MFM chuan an hmalakna hrangte sawiin CSR an dil hlawhtlin theih nana bialtu MLA hmalakpuinaah lawm thu a sawi a, Vaivakawn chhiat tawkte tanpui nan hian chhungkaw 30-te hnenah Alu, buhfai leh dal bag khat theuh bakah chhungkaw 5 te hnenah sintex (1500L) pakhat theuh pek an nih thu a sawi.

Mission Foundation Movement hi Pu R. Vanlalzauva’n Mizoramah kum 2001 khan a din a, mi chanhaite chhawmdawl leh chhiat tawkte tanpuina kawngah an thawhhlawk hle a, tun dinhmunah hmasawnna atana project kal lai 22 nei mekin Skill Development, Entrepreneurship, Health, livelihood, Environment leh emergency relief-ah te project an kalpui mek a ni.