Higher & Technical Education Minister-in Govt. T. Romana College Fresher’s Social leh Graduation Day a hmanpui

#ZONEWS Aizawl July 25, 2025: Higher & Technical Education Minister Dr. Vanlalthlana chuan vawiin khan Govt. T. Romana College (GTRC) Fresher’s Social & Graduation Day chu Khuallian ni a hmanpuiin, College Magazine ‘RALTIANG’ a tlangzarh a ni.

Higher & Technical Education Minister Dr. Vanlalthlana chuan GTRC chu Pu T. Romana inpekna atanga bultan leh tun hun thleng thei a nih thu sawiin, beidawn mai lova teirei peihna neia beih tang tangna chu hlawhtlinna hmu tura thil pawimawh hmasa a ni, a ti a. College chu zirna ngawr ngawr piah lamah thil dang tam tak zir belhna hmun a nih tel thu sawiin, abikin tunlai thiamna, Artificial Intelligence leh communication skill-te chu chhawr tangkai thiam a tul chhoh zel tur thu a sawi a. Minister a nihna angin zirna hmasawn nan huaisen taka theihtawp a chhuah zel tur thu sawiin, sorkar pawhin Govt. T. Romana College mamawhnate hriain lift/elevator dah tura ruahmanna a kalpui mek thu a sawi a ni.

College Principal Dr. Jenifer Lalbiakdiki chuan inlawmna thu sawiin, Minister-in hun pawimawh tak a hmanpui avang leh Sorkar-in college a duhsakna zawng zawngte avangin lawmthu a sawi a. Rawn lut tharte chu college VIP te an nih thu leh thinglung taka an lo lawm thu sawiin, kal chhuak turte pawh ram leh hnam tana theihtawp chhuah zel turin duhsakna a hlan a ni.

Vawiin hun hmanah hian zirtirtu, zirlai lut thar leh kal chhuak turte atangin thusawi tawi bakah SU atangin report ngaihtlak a ni a. College-in a lo kalpui tawh thin angin mahni class theuha ti tha ber thlan chhuah zirlaite hnenah chawimawina award 16 lai sem chhuah a ni a. Chawhnu lamah hun hman chhunzawm a ni.

GTRC hi kum 1992 khan bultan niin, mi thahnemngai leh inpete zarah tun dinhmun hi an thleng thei a ni. Tun dinhmunah hian zirlai 1,066 nei mekin, kumin hian zirlai 295 te’n BA an zo a ni.