VISION OLYMPICS 2036 CHUNGCHANGAH INRAWNKHAWMNA NEIH A NI

#ZONEWS July 18, 2025: Sports & Youth Services (S&YS) Department chuan vawiin khan Directorate of Sports & Youth Services Conference Hall-ah Sports Discipline 34 aiawhte nen Vision Olympics 2036 chungchanga inrawnkhawmna hun an nei.

S&YS Joint Secretary Pu H. Dolianbuaia chuan he hunah hian thu sawiin, Mizoram aiawha chhuakte’n National Games hrang hrangah medal 50 vel an lak tawh thu a tarlang a. Olympics-a tel tura hmathlir neih chu a pawimawh a, sawrkar pawhin hma a la chhunzawm zel dawn tih a sawi a. Infiamna chu eizawnna tlak, kan ram economy atana thawhhlawk a nih mai bakah ruihhlo laka kan thalaite chhahchhuahna kawng tha tak a ni, a ti a. Vision Olympics 2036 chu a tak ram chantir tur leh infiamna chawisang tur chuan kan ‘Education System’ nen a kal rual a ngai a, nu leh pate leh khawtlangin kan infiammite pawh kan dâwm chhoh zel an ngai a ni, tih a sawi a ni.

Pu Henry C. Lalrawnkima, Mizoram State Sports Council (MSSC) Secretary chuan kalkhawmte lawmna thu sawiin, thupui a sawi hawng nghal a. Sawrkar hmalakna hrang hrangte tarlangin, 2036-a India ramin Olympics thlen a tumnaah hian India aiawha Mizo infiammite an tel theihna tur dap mek a nih thu leh coach-te chu, mi thiamna leh theihna phawk chhuak thiam, infiammite theihna tipung tur leh hlawhtlinna chang thei tura tuaihriam thiam mi an nih avangin Vision Olympics 2036 tihhlawhtlinna tur hian an pawimawh hle tih a sawi.

Vawiin inrawnkhawmna hun hi S&YS Deputy Secretary Pi Marilyn Rualzakhumthangi’n hun a kaihruai a. Sports Discipline hrang hrang Coach-te leh Association aiawhte atangin Olympics 2036 atana an hmalak mekna, hmalak tum dan, leh hmathlir ngaihthlak niin, sawihona neih zawhah S&YS Director Pu H. Lalhmingthanga’n tlipna thu leh lawmthu sawiin hun a khar a. He hunah hian Pu C. Lalremsanga, 1992 Barcelona leh 1996 Atlanta Summer Olympics-a India aiawha Archery-a lo chhuak tawh pawh a tel a ni.

Directorate of Sports & Youth Services-te hian he inrawnkhawmna hun an buatsaih hma hian sports discipline hrang hrang aiawhte atangin report an la khawm a. He’ng report-te leh vawiina sawihona hun atangte hian ruahmanna kalpui dan tur pawimawh zual siam a, Vision Olympics 2036 atana inkaihhruaina leh rawtnate siam an tum a ni.