#ZONEWS: BJP Mizoram chuan CADC Governor Rule puan chungchanga Home Minister Pu K. Sapdanga’n Larsap thutlukna demna thu a sawi chu Mizorama thil la thleng ngai lo a ni tih sawiin pawi antih thu a sawi.

#ZONEWS July 10, 2025: BJP Mizoram chuan CADC Governor Rule puan chungchanga Home Minister Pu K. Sapdanga’n Larsap thutlukna demna thu a sawi chu Mizorama thil la thleng ngai lo a ni tih sawiin pawi antih thu a sawi.

Vawiina Aizawl Press Club a thuthar thehdarhtute an kawmnaah BJP National Minority Morcha Secretary Pu Delson Notlia, MDC chuan he thu hi sawiin, India Constitution Sixth Schedule hnuaia Autonomous District Council te chungah Larsap chuan thuneihna sang tak an nei a ti a. Chakma Autonomous District Council chu India rama Autonomous District Council 10 zingah a buai zing bik hle tih sawiin, CEM an thlak zin bakah eirukna leh sum indaih lohna a nasa hle a ti a.

Mizoram Governor chuan CADC dinhmun chu uluk taka a en hnuah a enkawlna hnuaia awm tul a tih avangin India Constitution in thuneihna a pek angin Governor’s Rule ah thla 6 chhung a dah phawt a ni a ti a. Hemi chungchanga July ni 8 a Home Minister Pu K Sapdanga’n thuthar thehdarhtute kova, Governor thutlukna demna thu a sawi chu Mizorama thil la thleng ngai lo a ni a ti.

Home Minister in Governor thutlukna siam chu mipui rorelna palzutna ang nia a sawi te, Governor chu Politics a inbeihna atana a hmang chu Mizoram BJP ten an dem thu a sawi a, tunhmaa MNF leh Congress sorkar lai pawhin Mizorama Governor lo awm tawh te chuan ADC te chungchangah thutlukna an lo siam fo tawh thin bakah Governor demna thu sawi chu Mizoramah a la thleng ngai lo anih thu a sawi bawk.

#zonews #tualchhung #politics #BJP #ZPM