#ZONEWS: Chin hill-a chho Military council operation-te thi leh hliam tuar tam vangin Kalaymyo-ah kir leh

#ZONEWS July 8, 2025: Kalaymyo atanga Chin hill lama chho Military council sipai tam tak operation-te chu Chin tang rual pawlten thla khat chuang dang chata an beihnaah thi leh hliam tuar an tam vangin Kalaymyo-ah an kir thu, Chin revolution tang rual pawlte hnen atanga hriat a ni.

“Tunah rih chuan, Military council-te Kalaymyo-ah an thleng vek tawh, an tlanchhe vek. Khaw tahtawlin ten fai hna kan thawk a, a tawpah Mualpi khua thleng kan lut. Mualpi khuaah chuan tawmna puk tha tak an lo siam a, Keini lam pawh hliam tuar kan awm angin sipai kan inthlau bawk a; mahse, theih tawp kan chhuah a, kan laksak. Tunah chuan Military council an fihlim tawh a, then fai hna kan thawk mek a, bomb kam then fai tur a la awm mek,” tiin Chin tang rual pawl thuneitu pakhat chuan a sawi.

May ni 18 atang khan Sagaing region, Kalaymyo atanga Military council sipai tam tak chho operation-te chu, May ni 21 atang khan Chin tang rual sipai pawlten dang chatin an beih rawn a, July ni 5 khan, revolution tang rual pawlten Mualpi khuaa inkulh Military council sipaite chu nilenga an beih hnuah an laksak thei ta a ni.

July ni 5-a inbeihnaah CNA sipai 3, CDF-Mara sipai 2, CDF-CDM Siyin sipai pakhat an thih bakah hliam tuar an awm a, Military council sipai 10 chuang an thi a, hliam tuar eng emaw zat an awm avangin an kir leh thu hriat a ni.

Thla khat chhung inbeihnaah Chin tang rual sipai pawl 10 chuang an thih balak hliam tuar an awm nual a, Military council sipai thi leh hliam tuar an awm nual thu Chin tang rual sipaite hnen atanga hriat a ni.
“Military council sipai thi leh hliam tuar an tam hle a, a hlimchhawn khan an ruangte chu Kalayamyo-ah an phur thla vek a, ruang leh hliam tuar eng mah a awm mumal tawh lo. Vedio clip-a mi kha kan beih hnunung ber ni 5-a, ruang lak lai a ni a, kan phum tawh. Tunah then fa ikan tawk mek a, a zat chiah ka la hre lo. Ramhnuaia ruang tawih a awm bawk a, Kalaymyo-a ruang phurh thlak pawh an nei nual a, chung chu kan ngaihven mek,” tiin Chin revolution tang rual pawlte hnen atanga hriat a ni.

Military council sipai 6 an man a, hliam tuar an mante pawh an enkawl thu hriat a ni.

Inbeihnaah ralthuam lian leh silai 30 chuang leh ralthuam kaihhnawih eng emaw zat an mansak thu hriat a ni bawk.

Light Infantry Battalion (LIB) 391, LIB 59, LIB 8, LIB 7, Tah Pah Yah 934, Division 33, Division 77, battalion 6-a Military council sipai 800 velte chu Chin hill-ah operation an neihnaah CNA, CDF-CDM Siyin, CDF-KKG, CDF-Lautu, PDF Zoland, CNDF, CDF Zophei, CDF-Mara, PDA, PDF Kalay, CDF-Matupi, TCDF, revolution tang rual pawlten thla khat chuang beihpuithlakin an dang chat a ni.

Military council operation avangin Kalaymyo leh Taingen kawnga Mualpi, Theizang, Hiangzing, Buansam leh Taingen khuaa mipui 1000 chuangte an raltlan mek a, khawchhungah bomb kam then fai hna an neih mek thu hriat a ni.

#zonews #chanchinthar #zofate