#ZONEWS: JOINT CIVIL SOCIETY OF MIZORAM (JCM) – PRESS RELEASE – JCM/PR/01/2025

#ZONEWS July 9, 2025: kan ramin kawng tha kan neih theihna tura hma la a, thawk ho zel turin JOINT CIVIL SOCIETY OF MIZORAM (JCM) chu date 8th July 2025 khan din a ni.

Mizoram Transformation Movement (MTM) huaihawt a inhmukhawm pawl pali; Centre for Environment and Social Justice (CESJ), Mizoram First (MF), Citizen Alliance for Truth and Social Justice (CATAJ) leh Mizoram Transformation Movement (MTM) te chuan kum 38 zet state kan nih hnuah pawh Mizoramin kawng tha kan la nei thei lo hi a mangang thlak kan ti takzet a, kan ramin kawng tha kan neih theihna tura hma la a, thawk ho zel turin JOINT CIVIL SOCIETY OF MIZORAM (JCM) chu date 8th July 2025 kan din a, he thawh hona huangah hian Mizoram hmasawnna leh thatna duh civil society dang te pawh tel turin kan sawm nghal a ni.
JCM hruaitu atan heng mite hi ruat nghal an ni a: Convener: Dr Lalbiakmawia Ngente. Co-Convener: Pu Lalram Mawia, Secretary: Dr Vanlalsiama Chhangte
Joint Civil Society of Mizoram (JCM) hian Mizoram chhunga kawngpui chhe lutuk chungchangah hmalakna chu chhunzawm zel nise, kan ti a, hetiang hian hmalakna hmasa tur duan nghal a ni:

1. National Highway 306 &06 (Vairengte to Sairang) hi Mizoram nunna hnar, kan mamawh zawng zawng chawk luhna (Life line) a ni a: chuvangin furpui hmain siamhat anih ngei theihna turin a mawhphurtute nawr zui zel kan tum a. A bik takin Kawnpui leh Khamrang inkar (Package 7&8) alingment thar siam tura rawtna chungchangah hian Sorkar Laipui, Ministry of Road Transport & Highway hnenah Alignment hlui zawk hi a thatna a tam zawk a kan hriat avangin rawtna thlen kan
   tum a ni.
2. National Highway 44A (Aizawl to Manu, Tripura), Tuidam leh Darlak inkar chhe lutuk leh chetsual hlauhawm tak hi siamthat thuai a nih theihna turin thuncitute hnenah thlen kan tum a. Hemi kawng hi tunkar ah JCM hruaituten a hmunah en kan tum bawk a ni.
   Kawngpui hian kan nitin nun leh mitin nun min nghawng avangin Mizoram chhung kawngpui hrang hrang-National Highway, State Highway leh a dangte pawh hi a theih anga siamthat chhoh zel a nih hi kan duh a. Khaw tin in kal pawhna kawng te pawh kawng tha tak siam vek turin he lama hma la thei tu Mizoram Sorkar, NHIDCL, Mizoram PWD te bakah Company leh Contractor hrang hrangte pawh theihtawp chhuah zel turin kan ngen a ni.
   Sd/-
   (DR LALBIAKMAWIA NGENTE)
   Convener
   Sd/- (LALRAM MAWIA) Co-Convener
   (DR VANLALSIAMA CHHANGTE) Secretary
   Dated: 9th July 2025