#ZONEWS: 7- KAMALANAGAR ‘W’ MDC BY-ELECTION TURAH DRAFT ELECTORAL ROLLS TLANGZARH A NI.

#ZONEWS July 9, 2025: 7-Kamalanagar West MDC By-Election neih tura inpuahchana kal mekah vawiin khan SDO (C) Conference Hall, Chawngteah Draft Electoral Rolls tlangzarhna neih a ni a. Pu Lalnunpuia Renthlei, SDO (C) Chawngte chuan Draft E/ Rolls hi a tlangzarh.

Pu Lalnunpuia Renthlei, SDO (C) Chawngte chuan 7-Kamalanagar West MDC nilai mek Pu Sanjiv Chakma, boral tak avanga by-election neih a ngaih thu a tarlang a. Democracy ramah chuan mipuiten an aiawh an thlan thin chu thil pawimawh tak a ni tih sawiin, inthlanna felfai leh thianghlim zawk a awm theih nan political party, NGO leh mipuite thawhpuiah a sawm a. Pu Lalnunpuia Renthlei chuan Draft Electoral Rolls tlangzarh theih a ni chu lawmawm a tih thu sawiin, hun leh tha tam tak seng a E/Rolls buatsaihtute fakawm a tih thu a tarlangin, election official – te chu hmalam hunah pawh theihtawp chhuah turin a chah nghal bawk.

Vawiina Draft Rolls tlangzarh tak atanga a lan danin 7-Kamalanagar West MDC constituency – ah hian elector – 1728 an awm mek a. Electoral Roll – a inthun duh emaw siamthat ngai a awm anih chuan July ni 14 thleng hun hawn a ni a, July ni 21 ah Final Electoral roll tlangzarh a ni ang. 7- Kamalanagar west MDC constituency ah hian khaw pathum- Kamalanagar-IV, Saizawh West leh Rajmandal, te an awm.

Pu Lalnunpuia Renthlei, SDO (C) Chawngte chuan Draft E/Roll tlangzarh tak hi Political party aiawh lo kalkhawmte hnenah Copy khat theuh a hlan nghal a ni.

#zonews #tualchhung