#ZONEWS: ZU LEH RUIHHLO DO AIIN CORRUPTION DO A PAWIMAWH. – RUATA SAILO

#ZONEWS ARTICLE: Zu leh ruihhlo do aia do tur pawimawh hmasa zawk chu CORRUPTION hi a ni. Kan Pathian thu – Bible chuan, “Zu hi hi sual tinreng bul a ni,” a ti lo va, “Ruihhlo hi sual tinreng bul a ni,” a ti hek lo. “Tangka sum ngainat hi sual tinreng bul a ni,” a ti zawk a ni. Chuvangin, Bible-in min hrilh ang hian kan ram leh hnam hmelma lian ber chu zu a ni lo va, ruihhlo a ni lo va, tangka sum ngainatna hi a ni a tih a chiang a ni. Tin, chu tangka sum ngainatna sual leh corruption hi thuhmun reng an ni. Corruption hi Zoram tlukchhiatna thlentirtu, ram leh hnam hmelma, sorkar leh kohhran hmelma a ni.

Corruption do bul tanna tur pawimawh ber contract hna inpek dan dik lo, tender chhuah dan dik lo te hi an ni. Political Party an lo sorkar apianga an inchuh nasat ber chu contract hna hi a ni; contract hna hi an sum siamna khawlpui ber a ni a, ruling party apiangin ram leh hnam aiin sum leh contract hna an vei zawk ngei ngei vek bawk a ni.

Kan ramah hian sum siam nan, ram hruaitute’n thuneihna hmangsuala, dan palzuta duhsak zawngte contract hna an pek mai mai hi a hluar em em a; tun hma atangin eng party pawh sorkar se hei hi tih dan tur ve rengah an ngai nghet tlat tawh a ni. A awmzia chu, dan lo hi dan emaw an ti zo tawh a ni. Hei tak hi dan bawhchhiatna lian tak, CORRUPTION ZUNG a ni.

Party worker-ho leh MLA, Minister-te thleng pawha ruling party apiangte an sum siamna khawlpui ber chu dan lo va contract hna inpek hi a ni. Inthlanna senso hmuh letleh tum tlat avanga dik lo taka contract inpek te hi corruption a ni. Ram leh hnam hmangaihtu dik tak chu beisei let nei lo vin, phut let nei lo vin, ral thak pawh huamin a insengso tur a ni. Chu chu hmangaihna dik tak a ni. Inthlan senso hmuh let leh tum reng reng chu nomination file ve tlak an ni lo, politics hi sum siamna hmun a ni lo.

Registered contractor pawh a ni lo va, Govt. Approved Supplier pawh a ni hek lo. Chuvangin, contractor aikal a la mai dawn em ni ang? Sorkar hnathawk aikal lak tihtawp hi a that em em rualin, hei aia pawimawh zawk chu contractor aikal lak tihtawp hi a ni. Sorkar hnathawh aikal lak hi Zoram tan chuan mita hmawlh te reuh te awm ang a ni a, contractor aikal lak erawh chu mita khanchhuk awm ang a ni. Sorkar hnathawk aikal lak aiin contractor aikal lak hi Zoram hian a tuar zawk daih!

Zoram siam nana pawimawh ber leh corruption do nana pawimawh hmasa ber chu a hnar thlit fim hi a ni. A hnar a fim phawt chuan a luang chhuak pawh a fim lo thei lo. Chuvangin, system dik, kalphung dika Mizoram hi kan kal theih nan contract hna tender reng reng hi CPWD Works Manual leh The Mizoram Public Procurement Rules 2020 kan hman mekte’n an phut ang zelin, dan dik tak veka tih ni se.

Ringlo mite kan tih te hian Restricted Tender lem an nei ve lo, Open Tender lem, Departmental Works lem leh Supervisor lem pawh an hre ve hek lo. Mi lem biate pawhin dan an zawm thlap thlap theih laia engati nge keini, Pathian nung be zawk, kohhran bel tlat, inkhawm uar em em hnam hian kan zawm ve theih tlat loh? Lal Isua ringtute kan nihna atanga teh phei chuan dan lo va sum siam leh corruption hi haw em em tur kan ni.

Restricted Tender lem, Open Tender lem, Departmental Works lem, Supervisor lem, contractor ni lo contract hna thawh tihte hi dan bawhchhiatna, corruption lian tak, sorkar tana pawha hekna, GST hloh duai duaina a nih bakah, Pathian huatzawng a ni tih hi kan sorkar hian a pawm ngam a hun tawh!
Sakawrtuichhun kawng dik lo taka Departmental Work LEM a thawh pawh tun thlenga thawh zawh a la ni lo cheu, a hnathawh test result lah chu a chhe em em leh nghal a, he corruption rahchhuah tuartu chu Mizo mipui te kan ni. Engvangin nge Restricted Tender LEM kha Departmental Work LEM a thawh anih? tih hi zawhna tawp thei lo a la ni reng!.

A TAK RAM HI HMACHHAWN NGAM TAWH TEH ANG U!

#zonews #article #ruatasailo

ARTICLE TE HI ZONEWS NGAIHDAN A NI VEK KHER LO