Mizoram chak lak luhna kawngpui NH 306 a chhiat avanga tuialhthei phurte an tlan ngam loh avangin Aizawlah petrol leh diesel a vang tawh hle.

#ZONEWS July 20, 2025: Mizoram chak lak luhna kawngpui NH 306 a chhiat avanga tuialhthei phurte an tlan ngam loh avangin Aizawlah petrol leh diesel a vang tawh hle.

Aizawl khawpui chhunga Filling station hrang hrangte’n petrol leh diesel hralh chhuah tur an nei mumal tawh lo a, nimin khan tuialhthei tlem a zawng lo thleng awmin filling station thenkhatah pek a ni a, petrol leh diesel laktuma intlar an tam hle a ni. Filling station thenkhat chuan tanker rawn thleng a awm leh zauh zauh thin avangin hralh tur chu an la nei niin an sawi a, filling station thenkhat bulah man to zawka petrol hralh chhuak an awm reng bawk.

Kawnpui Police station atanga thu dawn danin nizan lam khan truck tangkhang eng emaw zat chu Aizawl lam panin rawn chhuah a ni a, hetih lai hian Kawnpui leh Sairang inkarah lirthei, bungraw phur leh dahzo tawh let leh tum tangkhang an la tam hle nia thu dawn a ni bawk.

Food, Civil Supplies & Consumer Affairs department hotute chuan kawng chhiaah tuialhthei phur tangkhang an tam avangin petrol leh diesel thleng tha lo mah se tuialhthei chu lut lo tawp a ni lo tih an sawi a, nimin lam khan Aizawla filling station zawng zawnga tualhtheih neih dan dinhmun tarlangin, diesel khawl sa litre nuai 1 chuang a awm thu leh, petrol pangngai pawh lirthei nuai 1 vel a awm thu an sawi a, petrol HP pawh litre sing 8 vel khawl sa awm meka ngaih a nih thu an sawi bawk. Filling station zingah tuialhthei litre sing chuang la nei mekte an awm avangin mipui tan chiai hluaina tur a awm rih loah an ngai bawk a ni.

He tih lai hian Aizawl leh Silchar inkar kawngpui National Highway a chhiat lutuk avang hian tuialhthei phur chauh ni lo, mipui nitin mamawh bakah insakna bungrua leh thil pawimawh dang phurtu truck-te pawh ke kawngpui a kal hi an tlem tawh hle a. Mizoram Truck Owners’ Association (MTOA) general secretary Pu Dina Tlau chuan an member hmun thuma hmun hnih vel chu he lai kawngah hian bungraw phurin an kal tawh lo niin Akashvani Aizawl a hrilh a. Truck khaltu leh truck tan he lai kawng hi a hlauhawm lutuk tawh a, chubakah a chhiat lutuk avangin tlan aiin din a hlawk tawh zawk niin Pu Dina Tlau chuan a sawi a ni.