Independence Day lawm dan tur relin Siaha-ah thutkhawm a ni

#ZONEWS July 21, Thawhtanni: August Ni 15 a Independence Day lo thleng tur lawm dan tur relin DC Mini Conference Hall, Siaha-ah Addl DC Pu Abraham Beirazi Khithie kaihhruaina hnuaiah vawiin khan thutkhawmna neih a ni.

Thutkhawm kaihruaitu Pu Abraham Beirazi Khithie chuan kumin Independence Day lawm dan tur relnaa kalkhawmte chungah lawmthu a sawi a, kum dangah harsatna lian tham awm lovin tluang taka hman thin a nih thu tarlangin kuminah pawh tluang taka hman a nih theih nan theihtawp chhuah tlan a tul, a ti a, programme hlawhtling tak hman a nih theih nan mitin thahnemngaihna a ngen nghal bawk.

Kumin Independence Day lawmna chu SDFA ground, Meisatla-ah chawhma dar 10 ah hman ni se an ti a, Khuallian atan Health & Family Welfare Minister Pi Lalrinpuii chu sawm nise an ti. Department hrang hrang chanvo leh mawhphurhnate insem in I-Day lawm nana Department te sum thawhkhawm tura an tuk te chu thahnemngai taka thawh theuh tura ngen leh hriattir an ni. Independence day puala tournament buatsaih tura dilna lut – Football leh Volleyball te chu an hruaitute nen inkawmhona neiin sawiho nise tih a ni a, parade contingent rehearsal leh tul dang buaipui turin addl SP kaihhruaina hnuaiah CMO, IPRO, DEO, DTO leh DC aiawhte chu ruat an ni bawk a ni.

VIP At home chu MADC CEM bungalow-ah hman leh nise an ti a, head of office te kim taka tel tum theuh tura ngen leh hriattir an ni bawk a ni. Kumin India in zalenna a hmuh Champha ah hian India khua leh tui tha nihna angin Ram tana Kan tih theih tawk urhsun taka he ni lawm kawngah mitinin theihtawp chhuah theuh se tih a ni bawk a ni.

Vawiin thutkhawmah hian Addl DC, Addl SP, DRDO PD, SDO (S), BDO/DDO, SDC te bakah Siaha a Sawrkar pisa hotute an tel a, tlawmngai pawl hrang hrang aiawhte leh chanchinthar thehdarhtute an tel bawk a ni.