KOLASIB DISTRICT LEVEL BEAUTIFICATION COMMITTEE NEIH A NI

#ZONEWS Kolasib August 05, 2025 : Vawiin chawhma dar 11:00 khan Kolasib DC Conference Hall-ah District Level Beautification Committee neih a ni a. He hun hi Kolasib DC leh District Level Beautification Committee Chairman ni bawk Robert C. Lalhmangaiha chuan a kaihruai a. UD&PA Department buaitsaih Beautification Competition-a Project siam kalpui dan tur leh lawmman dawnte hman dan tur he hunah hian rel a ni.

Vawiina Kolasib District Level Beautification Committee neihna ah hian Kolasib DC Pu Robert C. Lalhmangaiha chuan District hmel mawina atan tha thawhtu pawimawh tak DUDO leh a thawhpuite hnathawh chu a lawmawm a tihthu a sawi a. Tlawmngai pawl hrang hrangte leh khawtlang hruaitute’n khua leh veng chhung nuam zawk leh changkanna zawk nei tura a thawkho thin chu a fakawm tiin hmasawnna leh changkanna kawnga Sawrkar hmalakna thlawp zel turin a sawm nghal bawk a ni.

Pi Josephine Zonunsangi, District Urban Development Officer (DUDO) chuan he hunah hian UD&PA Department hnuaia Beautification Competition neih dante Report a pek bakah Kolasib Beautification Committee hmalakna te sawizauna a nei a. Public Transportation dinna hmun thenkhat chu Traffic Management Committee hmalakna hnuaiah mumal zawka siamrem a nih thu DUDO hian a tarlang a. Forest Department hmalakna hnuaiah Thing engemaw zat hmun hrang hrangah phun a nih thute leh Education Department hmalakna hnuaiah Composite Pit leh Incinerator-te mumal taka kalpui a ni thu a sawi a. District Hospital-a thawktute hmalakna in khawpui Thianghlimna kawnga hmalaknate a tarlan bakah Kolasib District cheimawina tura rawtna hrang hrang awmte he hunah hian chhawpchhuahna hun Kolasib DUDO Pi Josephine Zonunsangi chuan a nei nghal bawk a ni.

He thutkhawmah hian Kolasib Town Profile tarlan dan turte, Surveillance Camera dah dan turte, Footpath leh Railing awm sa te tuaithar dan chungchangte, khaw chhunga Cable inzam hnawk chinfel dan turte ngaihtuah hona neih a ni a. Thing tam zawk phun belh dan turte sawi hona neih a nih bakah Vantlang hmun thawmthat leh cheimawi dan tur sawiho a ni.

Vawiina Kolasib District Level Beautification Committee neihna ah hian Pi B. Malsawmtluangi, Addl. DC, Pu F. Lalthlamuana, Addl. SP, Pu Lalmuanpuia, Project Director DRDA, Dr. Samuel Lalfakawm Fanai, District Medical Superintendent(DMS), Pi Josephine Zonunsangi, DUDO, Pu Vanlalchhana, District Education Officer(DEO) leh Sawrkar Officials dangte bakah Kolasib Joint VC hruaitute MUP, MHIP leh  YMA hruaitute an tel thei a ni.