SCHOOL EDUCATION MINISTER-IN GOVT COMPREHENSIVE MODEL SCHOOL A TLAWH

#ZONEWS Aizawl October 24, 2025 : Vawiin khan School Education Minister Dr Vanlalthlana’n Govt Comprehensive Model School a tlawh a, Skills laboratory atana room sak mek chu a hmunah a tlawh.

School Education Minister chuan Govt Comprehensive Model School Zirlaite hmaah thusawiin lehkha a zir laiin Model school chu an unaua an luh thinna a nih thu te, hetih laia zirtirtuten an enkawl that thu te leh Govt School atang pawhin Minister hial a nih theih thute a sawi. Zirlaite chu an zir chhuah hnuah mi puitling an nih theih nan lehkha an zir laiin an tum tisang tur te, rilru puthmang dik leh hrisel nei turin a fuih bawk. Model School chuan Laboratory tha tak an neih tur thu te a sawi.

Minister hian thawktute nena an inkawmnaah pawh thusawiin ModelmSchool-a Skill Lab an dah tur chu zirlai dangte pawhin an rawn pan tur a nih thu te, Sorkar sikul tihchangtlun an tum thu te sawiin thawktute chu theih tawpa tan la turin a fuih a, classroom-a zirtir mai bakah a piah lamah pawh hun leh tha pe tam tur te, Zirlaite enkawlna kawngah vawi lehkhata zuang thut lova hmasawn hret hret zawnga kal a tul thu te, naupang enrollment tipung zel tur khawpa thawh a ngaih thu te a sawi.

Pi Angela Zothanpuii Director School Education pawhin thusawiin Model School-a Bharat Force ten Skill lab an din dan tur te, tun hmaa Atal Tinkering Lab aia changkang zawk a nih tur thu te, India hmarchhaka a hmasa ber a nih dawn thu te leh School level atan chuan a changkang ber a nih tur thu te, School naupang dangte pawhin an tlawh leh chhim tur a nih thu te a sawi.

Pu C.Lalthanzira SPD pawhin thusawiin sorkarin School-a zirna hmanrua tha tak tak a pekte chu School-ten an hman tangkai a tul thu a sawi a, sorkarin sum tam tak senga hmanraw tha a pek hi zirtirtuten an hman tangkai loh chuan hman loha dah chhiat a ni leh mai thin a, hei hi a pawi hle tih sawiin sorkar hmalakna te hman tangkai a tul thu a sawi bawk.

Govt Comprehensive Model School hi kum 1969-a din a ni a, tun dinhmunah thawktu teaching leh non-teaching 31 an awm a, zirlai Primary atanga High School thlengin 254 an awm a ni.  Minister-in Govt Comprehensive Model School a tlawhnaah hian School Education Director Pi Angela Zothanpuii leh Samagra Shiksha  SPD Pu C.Lalthanzira ten an tawiawm a ni.