Champhai Town Sanitation Task Force an thukhawm

#ZONEWS Champhai August 26, 2025: Vawiin khan DC Conference Hall, Keifangtlangah Champhai khaw chhung faina leh vawn thianghlimna chungchang sawiho turin Champhai Town Sanitation Task Force an thukhawm a, Addl. DC Pu K. Zorammuana’n a kaihruai.

He task force atana Member-Secretary leh District Urban Development Officer ni bawk Pu Ngulzathuama’n Town Cleanliness Plan an siam tawh thu sawiin rawtna hrang hrang – pisa hrang hrang atanga pawisa thawhkhawm te, reels/video insiamsiak te, Village Council, YMA, kohhran leh pisaah te hnatlang leh faina chungchanga inhrilhhriatna neih te, cleanliness rally te, concert te a sawi lang a. Thukhawm chuan pisa hrang hrang atanga hnathawk hrang hrang te’n theih dan tawk zelin pawisa thawh khawm an rel a, reels insiamsiak hi September thla chhungin buatsaih ni se, lawmman pakhatna atanga pathumna bakah consolation prize 5 pek ni se tiin an rel bawk. Cleanliness rally leh concert huaihawt a ni ang a, faina inzirtirna atan poster, banner leh lemziak hrang hrang tihlan a ni ang a, concert-ah hian bawlhhlawh mumal taka paih tur inzirtirna awmin bawlhhlawh chambang awm lo (litter free) a siam tum a ni. August thlaa khawtlang inthiarna hmun endikna neihnaa thil hmuh hrang hrang te sawiho a ni bawk. Chairman Pu K. Zorammuana chuan Champhai a fai zel na’n tan la thara hma sawn zel turin kalkhawmte a fuih a ni.

He hunah hian task force member kim takin an tel a ni.