Lungleiah DCC/DLRC/DLSC an ṭhu khawm

#ZONEWS Lunglei August 26, 2025: Vawiin khan Lunglei District Consultative Committee (DCC), District Level Review Committee (DLRC) leh District Level Security Committee (DLSC) chu an Chairman, District Bawrhsap Pi Navneet Mann hovin Lunglei DC Conference Hall-ah an ṭhu khawm.

Chairman Pi Navneet Mann chuan loan rulh ṭhat loh (non performing assets – NPA) awmte chin fel thuai a nih theih nan bank-te chu theih tawp chhuah tura chahin, mipuite hnena sum enkawl thiam zirtirna (Financial Literacy Campaign – FLC) pawh a tam thei ang ber buatsaih turin a chah a. Bank-te leh sawrkar line department hrang hrangte chu District hmasawnna tur leh mipuite tan ṭha taka thawk ho zel tur te, bank kal tlanga hamṭhatna scheme hrang hrang awmte pawh mipuite hnenah uar zawka puangzar zel tur te’n a chah.

He ṭhut khawmah hian Lead District Manager Pu R. Lalmalsawma leh RBI Aizawl Lead District Officer te bakah, bank hrang hrangte, line department-te leh Sub-Headquarters YMA leh MHIP ai awhte an tel a. Kum 2025 April aṭanga June thla (1st Quarter, 2025-2026) chhunga Lunglei District-a bank hrang hrangte hna thawh thlir let niin, hmachhawp an neih leh hma lak zui dan tur te sawi ho nghal a ni.

He hunah hian bank sum vawn himna (security) lam leh pawisa leng vel (currency management & remittance) chungchang sawi ho a nih bakah, vantlang hamṭhatna atana sawrkar ruahmanna – Pradhan Mantri Jeevan Jyoti Bima Yojana (PMJJBY), Pradhan Mantri Suraksha Bima Yojana (PMSBY) leh Atal Pension Scheme (APY) te thlir ho niin, PMJJBY-a inziak lut thei mi 58,332-ah mi 7,523 (12.90%) leh PMSBY-a inziak lut thei mi 1,01,502-ah mi 18,214 (17.94%) inziak lut an awm thu leh APY-a inziak lut mi 1,659 an awm thu tar lan a ni a. July ni 1, 2025 aṭanga thla 3 chhung beihpui thlak (3 months saturation campaign) kalpui mekah, August ni 8, 2025 thlengin PMJJBY-ah mi 696, PMSBY-ah mi 750 leh APY-ah mi 52 ziah luh belh an ni tawh a. Bank hrang hrangte’n Financial Literacy Campaign ṭum 28 an buatsaih thu leh mi 1,165-in an chhim thu tar lan a ni bawk.

Bank-a mipuiin sum an dah luh (deposit) zat za zela bank-in mipuia sum an puktir (credit) zat chhutna, Credit/Deposit Ratio (CD Ratio)-ah Lunglei District-a bank branch 23 te’n 1st Quarter 2025-26 chhungin CD Ratio 69.95% an nei tih tar lan a ni a. Kisan Credit Card (KCC) hnuaiah crop loan 707 (cheng nuai 953.38 leh animal husbandary loan 345 (cheng nuai 518.03 pek chhuah niin, MUDRA (PMMY) loan 441 (cheng nuai 508.54) pek chhuah a ni bawk a. PMJDY hnuaiah bank account 62,465 awmin, 24.94% chu zero balance account a ni a; RuPay Card pek chhuah 42.19%, RuPay Card nung 34.75% leh Aadhaar nena thlun zawm 64.88% a awm a. July aṭanga September 2025 chhungin PMJDY leh Re-KYC atan beihpui thlak (saturation campaign) kalpui mek a ni bawk.