CHIEF MINISTER-IN Mizo DiasporaHub portal HAWNG

#ZONEWS July 21, 2025 Thawhtanni: Vawiin khan RB McCabe Hall, Aijal Club-ah Chief Minister Pu Lalduhoma chuan Mizo Diaspora Cell ten LushAITech nena tangkawpa an siam khawvel hmun hrang hranga cheng Mizote inthlunkhawmna tur internet portal thar Mizo DiasporaHub a hawng.

A hawnna thu a sawinaah Chief Minister chuan, kalphung thar, mipui sawrkar kan intiam ang tak khan, kan sawrkar hnuah kalphung thar kan siam hnem tawh a, chung zingah chuan tunlai thiamna hmanga mipui leh sawrkar indawrtawnna lam a tam hle. A langsar te chu;

Mipui Aw – Public Grievances & Redressed Mechanism te, e- Ram – Mipuiten awlsam taka Land Revenue & Settlement an dawrna app te, e-OPD – Aizawl Civil Hospital-ah online a OPD card lak theihna te, Kai Apps – sawrkar hnathawkte attendance lakna te, SDG Dashboard – Mizorama khua zawng zawng SDG status en theihna te, MPLAN – Sawrkarin hmasawnna hna a thawh zawng zawng vilna tur Apps te, ILP online te leh e-office leh filing system te an ni a. CMO ah ngei pawh awlsam zawka document han dah that a, kan duh huna kan hai chhuah leh zung zung theihna cloud based filing system kan hmang der tawh a ni.

Khawvel ram hrang hranga awm, Zofate nena inthlunzawmna tha neih hi kan rilruah a thi thei lo va. Kan sawrkar ve leh chu mi lam hna thawktu tur Mizo Diaspora Cell chu Chief Minister Office-ah kan din ta a, a tir lamah ram pawna tangkhang tanpui ngaite an theih ang angin an tanpui a. Inthlunkhawmna lam an buaipui leh a, chu an hmalakna rah duhawm tak chu vawiinah Mizo DiasporaHub tiin kan lo hawng thei ta a ni.

Welfare/Association ten tangkai takin he portal hi lo hmang ula, registration lo ti vek ang che u. Inhretawnin awm ila kan duh a, tanpui kan ngaihnaah kan thawk dun ang a, sawrkar thilte kan inhrilh hre bawk ang a. A bik takin an awmna rama harsatna tawk, sawrkar inrawlh a tulna thilah a tangkai zual ang. Tin, he Apps ah hian welfare ten an inrelbawlna lama an tangkaipui theih tura ngaih thil kan dah tel a. Hei hi welfare te thuneihna va chuhpui emaw va nekna atana siam a ni lem lo va, an awlsamna tur siamsakna zawk a ni, a ti.

An thawhrimna avangin Diaspora Cell leh sawrkar sum sen ngai lo va portal siamsaktu LushAITech te chungah lawmthu a sawi a ni.

Chief Minister hian, kan thalai vak chhuak te lo fimkhur ula, mawi takin lo khawsa ula, in awmna ram dan te zah takin lo zawm ang che u. Mahni awmna hmun apiangah kan hnam timawitu nih tum zel ang u, tiin a chah a ni.

Pu Vanlaldina Fanai, Chairman, Diaspora Cell pawhin thusawiin, Diaspora Cell chu kum 2024 June ni 11-a din tan a ni a. A tir lamah kha chuan ram pawna harsatna tawk te chhanchhuah kha kan hna hmasa a ni.

Dan ang taka ram danga an kal hi chuan harsatna an tawh pawhin hmalak a nuamin a awlsam thin a. Nimahsela, dan bawhchhiaa an kal a, man an va tawh te, harsatna an tawh chang te hian hmalak a har em em thin, a ti a. Dan ang thlap zela ram pawna chhuak vak thin tur leh an awmna ram dan te zawm thin turin a chah.

China rama zirlai tangkhang mek leh Cambodia lama harsatna tawk mek te tana an hmalakna mekna tlangpui pawh sawiin Ministry of External Affairs te nena tangruala an bawhzui mek thu a sawi a. Hman ni lawka Mizoram tlawha lo zin Pu Surinder Bhagat, Protector General of India bulah khan eng kim kan lo thlen a ni, a ti.

Mizo DiasporaHub chung chang sawiin, tunah hian welfare/association tan registration kan hawng mek a, he mi zawh hian mimal registration kan hawng leh ang. He portal hmang hian miin a va vahchhuahna hnai vaia Mizo Welfare lo awm te awlsam takin a hre thei dawn a, an inkhawmna hmun te, an pawl hruaitute contact pawh a hre thei ang. Tin, AI hmanga thuam a ni a, zawhna pawh zawh theih a ni. Enge maw rikrum thila thu inthawnna tur SOS chenin dah a ni, a ti. Portal hi LushAITech ten an siam niin an enkawl chhunzawm dawn a, a tul angin tihchangtlun chhoh zel a ni ang, tiin portal kalpui an tum dan pawh a tarlang.

Diaspora Cell-in hma an lo lak tawhna an thawhpui te; Ministry of External Affairs, Home Department, SP (CID), SP (Crime Branch), LESDE, MYC leh Law & Judicial te chungah lawmthu a sawi bawk.

Portal hi play store leh apps store atanga download theih a ni a. Website atanga luh theih a ni bawk.

A hawnna inkhawmah hian Dr. Vanlalthlana, Minister, ICT, Pi Lalrinpuii, Minister, Social Welfare, Pu Lalnghinglova Hmar, Minister, LESDE bakah Adviser to CM te, officials te, tlawmngaipawl hruaitute, Diaspora Cell member te, LushAITech thawktute an tel a ni.