Cleanliness Awareness Campaign Siaha-ah buatsaih a ni

#ZONEWS Siaha August 05, 2025: MADC a Local Administration Department (LAD) buatsaihin vawiin khan MADC Golden Jubilee Hall, Siaha-ah Cleanliness Awareness Campaign buatsaih a ni a, Pu Joshua Chozah, Under Secretary LAD, MADC chuan he hun hi a kaihruai a ni.

 Pu K Chhuabei, EM, LAD MADC chuan Siaha khawpui hmasawnna tur leh faina ngai pawimawha kalkhawmte chungah lawmthu a sawi a. Khawpui a lo fai zual deuh deuh theihna turin vawiin kalkhawmte chu an pawimawh takzet a ni, a ti. Khawvel thang chho zel chuan faina a keng tel tlat a, India ram leh Mizoram ang pawhin Sawrkar leh Khawtlang tang rualin theihtawp an chhuah mek zel a ti. Mizoram Khawpui Fai inelnaah (2023-24) Siaha chuan Pathumna lawmman a la a, nikum 2024-25 ah hma sawn chho hretin pahnihna dinhmun a luah chu Sawrkar Department-te bakah NGO, VC leh Kohhrante thahnemngaihna leh thawhhona zar a ni a, hun lo la kal zel turah pawh theihtawp chhuahpui turin a sawmin a ngen a ni. Pu K Chhuabei chuan ‘mipuite chu rilru put hmang thlak danglam (moral reformation) kan mamawh hle a, khawpui fai kan neih theih nan a chhunga chengte kan pawimawh ber’ a ti. Faina chuan hriselna a keng tel tlat tibawkin rilru leh taksa damna leh hriselna atan faina ngai pawimawh theuh turin kalkhawmte a sawm bawk a ni.

 He hunah hian Siaha khawpui a lo fai zawk theih nan thupui hrang hrang sawiho a ni a, Solid Waste Management, Sanitation Point chungchangte, Segregation of Wastes, Kohhran ruai siam chungchangte leh waste to wealth competition chungchangte sawiho a ni.

He Awareness Campaign-ah hian Rev Thylua Hlychho, Clean Siaha Committee Chairman chuan Hunserh a hmang. Pi S Lalmuanpuii, Sr LAO, MADC chuan Presentation on Sanitation a nei a, Pu Henry PL Hnaihly, LAO, MADC hnen atangin Sagregation of Wastes chungchang ngaihthlak niin Chairman in lawmthu sawina neiin vawiin hun chu tihtawp a ni.