Saitualah World AIDS Day 2025 hman a ni

#ZONEWS Saitual December 1, 2025: Vawiin khan Saitual District AIDS Prevention and Control Committee (DAPCC) buatsaihin YMA Zawlbuk, Keifangah “Harsatna kara AIDS hma chhawn dan thar’ tih thupui hmangin World AIDS Day 2025 hman a ni.

He hunah hian Pu VL Hmangaihzauva, Project Manager, Peniel Drop In Centre chuan thu a sawi a, kumin thupui “Harsatna kara AIDS hma chhawn dan thar” chu sawifiahin, National AIDS Control Organization (NACO)-in HIV AIDS a darh zel tur venna kawnga hma an lak dan te leh an hma chhawpte a tarlang bawk a ni.

Pu VL Hmangaihzauva chuan HIV darh zelna tur venna atan chuan mahni inhriat chian a, thisen test ngam a pawimawh a ti a, HIV positive te chuan ICTC-ah counselling tha tak an dawng thei tih sawiin, ART-ah damdawi tha taka an ei chuan midang kai darh lo turin an inveng thei tih a sawi bawk.

HIV AIDS inkaichhawnna tam ber chu syringe thianghlim lo inhman tawm atang te leh mipat hmeichhiatna hman khaw loh te a nih avangin kalkhawmte, a bikin zirlai naupangte chu hunpui lo thleng turah an nun fimkhurpui turin a chah a, mahni inhrechiang tura thisen test ngam tur leh HIV AIDS darh zelna tur venna kawnga theih tawp chhuah a, tan la zel turin a sawm bawk a ni.

Vawiin inkhawmah hian Capt. HS Lalramkinlova, Salvation Army, Saitual CO chuan hunserh a hmang a, Pu VL Hmangaihzauva, Project Manager, Peniel Drop In Centre  chuan thu sawiin, Dr. Zothanpari Chhakchhuak, Dy. CMO, District AIDS Control Officer nib awk chuan lawmthu sawinain hun a khar a ni. Vawiin inkhawmah hian DAPCC member te, Peniel Drop In Centre client te leh Saitual District Higher Secondary School naupangte an tel a ni.