Lungleiah kum tling lova nupui pasal inneih nghawng ṭha lo leh a khapna dan zir hona buatsaih a ni

#ZONEWS Lunglei December 11, 2025: Vawiin khan Women & Child Development (WCD), Health & Family Welfare (H&FW), School Education Department leh Lunglei District Legal Services Authority (DLSA) te ṭang ho huaihawtin Lunglei DPO Conference Hall-ah kum tling lova nupui pasal inneihin nghawng ṭha lo a neihte leh a khapna dan zir hona, “Awareness Campaign/Training on Child Marriage & Early Motherhood” buatsaih a ni.

He hun hi Lunglei ICDS Project-a Child Development Project Officer Pi R. Lalhmingliani chuan kaihruaiin, hun buatsaih chhan a sawi fiah a. Resource person pahnih – Advocate Pu J. Lalruatfela leh Lunglei District Immunisation Officer Dr R. Lalsanglura te’n thupui pawimawh tak tak zirtirin, zawhna leh chhanna leh sawi hona hun hman a ni bawk.

Advocate Pu J. Lalruatfela chuan kum tling lova inneih khapna dan, “The Prohibition of Child Marriage Act, 2006” chungchang zirtirin, he dan hnuaiah hian India ramah mipa kum 21 leh hmeichhia kum 18 tling lote chu inneihtir khap a nih thu te, mipa kum tling tawhin hmeichhia kum tling lo nupuia a neih chuan kum 2 chhung hrehawm taka tantir emaw, pawisa cheng nuai khat thleng chawitir emawa hrem theih a nih thu te a tar lang a. Kum 2024-2025 chhungin Lunglei District bikah kum tling lova inneih thubuai ziah luh 20 a awm thu sawiin, kum tling lova inneihna chuan kawng hrang hrangin mimal leh khawtlang tan harsatna leh buaina a thlen theih thu te, zirna leh ei zawnna kawngah pawh hmeichhe tan harsatna nasa tak a siamsak theih thu leh khawtlang hmasawnna thlenga a ṭha lo zawnga a nghawng theih thu a sawi a. Kal khawmte chu an khawtlangah kum tling lova inneihna a thlen loh nana a ṭul anga hma la tur leh inzirtirna kalpui ṭhin turin a chah.

Lunglei DIO Dr R. Lalsanglura chuan kum tling lova inneihna chu hmeichhiate hriselnain a tuar theih thu leh raicheha thihna leh nauchhiat a pun phah thei dan te a tar lang a. Hmeichhia leh naupang hriselna atan kum tling lova fa neih pumpelh a ṭul thu sawiin, hriselna kawnga fimkhurna tur hrang hrang bakah, sawrkarin mipuite hriselna atana ruahmanna a neih hrang hrangte a tar lang bawk.

Lunglei khaw chhunga Local Council tin Secretary-te, Middle School zirtirtute, DIET Lunglei staff-te leh sawrkar department hrang hrang official leh staff-te’n he hun hi an chhim a ni.

The Mizoram Prohibition of Child Marriage (Amendment) Rules, 2023-in a phut angin district tina District Programme Officer (Women & Child Development) te leh block tina Child Development Project Officer (ICDS) te chu kum tling lova innwih khapna keng kawhtu, Child Marriage Prohibition Officer (CMPO) atana ruat an ni a. An bial chhunga kum tling lova innei an awm leh awm loh zawng chhuak tur te, an awm a nih chuan dan anga hma la theih tur te’n mawhphurhna leh thuneihna pek an ni a. Hetih rual hian Mizoram sawrkara Social Welfare, Tribal Affairs, Women & Child Development Department Commissioner & Secretary-in September ni 10, 2024-a thu a chhuah tawh angin khua leh veng tina Village Council Secretary te chu Child Marriage Prohibition Officer (CMPO) atan hian ruat tel an ni bawk.