Home Minister Pu K. Sapdanga’n John Williams Hospital Lunglei leh Christian Hospital Serkawn te a tlawh

#ZONEWS Lunglei August 18, 2025:  August 16, 2025 Inrinni kal ta khan Mizoram sawrkara Home, UD&PA leh DP&AR Minister Pu K. Sapdanga chuan Lungleia damdawi in pahnih – Mizoram Presbyterian Kohhran enkawl John Williams Hospital leh Mizoram Baptist Kohhran enkawl Christian Hospital Serkawn te a tlawh a, damdawi ina thawktute nen inkawm hona hun an hmang.

Minister hi a nupui Pi Darkhumi, Lunglei HPC Vice Chairman Pu V. Malsawmtluanga, Lunglei South bialtu MLA Pu Lalramliana Papuia, Lunglei West bialtu MLA Pu T. Lalhlimpuia, LMC Chairman Pu Lalzuithanga leh councillor-te, UD&PA Secretary Pu Lalmalsawma Pachuau, District Bawrhsap Pi Navneet Mann leh official dangte’n an ṭawiawm a. John Williams Hospital Lunglei a tlawhnaah hian Medical Superintendent Dr K. Lalsanga hovin damdawi ina thawktute’n lo dawngsawngin, damdawi in an lo fan kualpui bakah, an hma lakna hrang hrang an lo hrilhfiah.

Minister Pu K. Sapdanga chuan damdawi in enkawl chu rawngbawlna pawimawh tak a nih thu sawiin, sawrkarin hma lakna hrang hrang a neihah kohhran leh mimal damdawi inte’n sawrkar an thlawpna leh thawhpuina a ṭhat thu a sawi a. John Williams Hospital-a thawktute chu ṭha taka sawrkar thawhpui zel tur leh mipui hrisel nan theih tawp chhuah chhunzawm zel tura chahin, duhsakna a hlan.

Christian Hospital Serkawn a tlawhnaah Minister hi BCM hnuaia Medical & Health Department Director Dr B. Laldinliana leh damdawi ina thawktute’n lo dawngsawngin, an hma lakna hrang hrang an lo hrilh fiah a. Thawktute nen inkawm hona hun buatsaih a ni bawk.

Minister Pu K. Sapdanga chuan Mizoram sawrkarin mipuite’n damloh nikhuaa inenkawlna ṭha an dawn theih nan Mizoram Universal Health Care Scheme (MUHCS) a duang tih sawiin, MUHCS-a siam rem leh en nawn ngaite lo zir chiang tura Review Committee dinah Chairman-a ruat a nih angin damdawi in chu tlawh a nih thu a sawi a. Christian Hospital Serkawn chu MUHCS timawitu leh tiphuisuitu hmasa ber, phur tak leh inhawng taka sawrkar thawhpuitu an nih angin an ngaihlu tak zet tih sawiin, BCM Kohhran leh damdawi in leh thawktute chungah sawrkarin MUHCS kal tlangin lawm thu a sawi a ni, a ti a. MUHCS chu Mizoram mipuite’n buaina awm lova kan chhawr tlan theih thuai a beisei thu a sawi.

Christian Hospital Serkawn hotute chuan MUHCS hnuaia an damdawi inin bill an neihte chu Mizoram sawrkarin rei rial lovin chawlhkar tin a pek chhuah zung zung thu leh pawisa an dawn ṭhat thu sawiin, sawrkar chungah an lawm hle tih an sawi.

Christian Hospital Serkawn hian May ni 21, 2025-ah MUHCS hi hmang ṭanin, damlo 786 te inenkawlna senso cheng nuai 151.75 chu Mizoram sawrkar aṭangin an hmu let tawh a. Kar tin chawh rualin cheng nuai 13.2 vel hmu ang an ni.

He hunah hian UD&PA Department kal tlanga Christian Hospital Serkawna damlo awmpuitute riahna tur, ‘Patient Attendants Shelter’ – mipa 5 leh hmeichhe 5 thlen theihna tur sa tura ruahman chu buaipui mek a nih thu leh fur zawh veleh hna ṭan theih beisei a nih thu tar lan a ni bawk.