HULHLIAP SSC CORE COMMITTEE MEETING NEIH A NI

#ZONEWS Aizawl August 20, 2025 : Vawiin khan Hulhliap Short Stay Center Core Committee chu an Chairman Pu Malsawmzuala Ralte, MYC Chairman ni bawk hovin an thukhawm a. Hulhliap SSC program vawi hnih neih tawha hmalakna te thlirletin Task Group hrang hrangten report an pe a ni.

Hulhliap batch 1-na ah khan a tawp thleng mi 116 an awm a, heng hi an chhuah hnuah Volunteer mi 43 in Follow-up psychosocial-counselling neiin home visit vawi 4 an nei tawh a, heta an hmuh danin mi 46 te chuan ruihhlo an la fihlim san a ni. Batch 2-na ah hian mi 263 awn tluanin anni pawh hi Volunteer 53 in an umzui nghal a. Home visit vawikhat nei tawhin mi 162 chuan ruihhlo an la fihlim san bawk a ni. Hulhliap atanga camp chhuak te tan hian follow-up bakah skill training hetiang hian ruahman mek a ni bawk:

1. Mistiri Training – mi 50 tan
2. Plumbing – mi 30 tan
3. Aluminium Fabrication – mi 30 tan
4. Assisstant Electrician – mi 30 tan
5. Basic Food Processing Course (Chips, Jam, Pickle Making, Juice beverage & fruits wine making, Powder & Ganule making, Food preservation, food safety procedures) – mi 25 tan Skill Training hi 1st September atanga neih tan theih beisei a ni bawk.

Hulhliap Camping atanga chhuak hi mi 379 an awm tawh a. Batch 2 atan hian Task Group hrang hrang sum hman tur hi Rs.81,93,852/- pek chhuah tawh a ni a. Batch 3-na hi August ni 25 ah tan leh tur niin Hulhliap SSC Program hi thla tin nakkum March thla thleng chhunzawm tura ruahman phawt a ni.