LADC INTHLANA HMANTUR DRAFT ELECTORAL ROLLS TLANGZARH A NI: LADC huamchhunga MDC inthlanpui lo awm turah Vote nei mi 53,880 an awm.

#ZONEWS Lawngtlai August 20, 2025: Vawiin khan BDO Conference Hall- ah kan hma lawka Lai Autonomous District Council (LADC) – a ’12th General Election to Member of District Council ( MDC)’ lo awm tura Draft Electoral Rolls, ni 1, January , 2025 tehfunga hmanga duan chu tlangzarh a ni a. Pu H. Zonunmawia, Project Director, DRDO chuan ‘Draft Roll’ hi tlangzarhin, Pu Collin Hlychho, Election Officer, chuan inkhawm hi a kaihruai a ni.

Vawiina Draft Electoral Rolls tlangzarh tak atanga a lan danin, LADC huam chhunga MDC inthlanpui lo awm turah hian vote nei mipa- 26,604 leh hmeichhia-27, 276 awmin, a vaiin vote nei mi – 53,880 an awm a. Polling Station- a Vote awm tamna ber chu 1/1 Pangkhua ( vote- 1072) niin, Polling Station- a vote tlemna ber chu 23/ 8,Hmawngbuchhuah (vote- 4) a ni. E/ Roll- a hming thun, paih emaw samthat duh tan September ni 4, 2025 thleng hun hawn niin, Final Electoral Rolls- hi September ni 30, 2025, ah tlangzarh a ni ang.

Lai Autonomous District Council (LADC) – a ’12th General Election to Member of District Council (MDC)’ inthlanpui tura inbuatsaihna kal zelah vawiin vêk khan BLO – te tan BDO Conference Hall- ah ‘Training’ neih nghal a ni bawk.