Serchhip DC hoin Agriculture Infrastructure Fund (AIF) chungchang an sawiho

#ZONEWS Serchhip August 20, 2025: Vawiin khan Serchhip DC Pu Paul L Khuma hoin DC Meeting Hall ah Agriculture Infrastructure Fund (AIF) chungchang ngaihtuah a ni a. Kuthnathawk pawl hrang hrang te leh line department te an tel.

AIF hi Central Sector Scheme niin sawrkar laipui chuan loneituten an thlai thar chhuah man to zawka an hralh theihna tur te, an dahkhawlna tur leh sawngbawlna tur te, hmunhma changtlung tak an siam theihna tura sum leh pai hmanga tanpuina a ni a. Mimal bakah FPO, PACS, SHG leh a dangte pawhin an hmang tangkai thei a. He scheme hmang hian hmasawnna ruhrel dinna tur cheng vaibelchhe 2 thleng loan an puk thei a. Kum 7 chhung kum tin 3%  interest subvention pek an ni a nga, dahkham (collateral) a ngai lo a ni.

Block Development Office, Cooperation Department, Horticulture Department leh Agriculture Department ten beneficiary list DC office ah an thehlut tawh a. DC lam hian zirchiangin a nihphung leh inkaihhruaina te Mizo tawngin an siam a nga, line department kaltlangin a zau thei ang bera thehdarh ni se tiin meeting chuan a rel.