INDIA VICE PRESIDENT JAGDEEP DHANKHAR A BANG

#ZONEWS July 22, 2025: Nizan tlai tawh takah khan Vice President ṭang lai Jagdeep Dhankhar chuan a hriselna dinhmun a tha tawk lo nia sawiin India Danpui Section 67(A) tlawhchhanin banna a theh lut..

A banna lehkhaah hian a hriselna a ṭhat loh thu leh amah enkawltu doctor te thu rawn anga bang a ni tih a tar lang. Kumin March 9, 2025 khan lung lam natna “cardiac related ailment” avangin AIIMS Delhi ah enkawl a ni a, thla hmasa mai khan Kumaon University Golden Jubilee lawmnaah nikhaw hre loin a awm bawk.

Vawiin July 21, 2025 Rajya Sabha inkhawm pawh Rajya Sabha Chairman anih angin a kaihruai tluan chhuak a. Rajya Sabha member thlan thar 8 te pawh member atan rinawmna thu tiam tirin a la lut bawk. Vice President aṭanga a banna lehkha hi zanin tlai lam tawhah khan President Draupadi Murmu hnenah a theh lut a ni.

Jagdeep Dhankhar (74) hi kum 2022 khan Vice President atan Opposition party candidate Margaret Alva hnehin thlan tlin a ni. Kum 2 term a la neih chu a bansan ta a ni.

Vice President ṭang lai term tawp hmaa bang pathumna a ni. Kum 1969 July thla khan V. V Giri chu President chuh turin a bang a, President ṭang lai Zakir Hussain thih vanga President thlan ṭul a ni. Hemi hnu kum 1987 July thla khan R. Venkatraman chu President atan thlan tlin anih avangin a bang a, kum 3 chhung Aug 1984 – July 1987 Vice President a ni hman.

Jagdeep Dhankhar hi politics-a a zuan luh hma hian Advocate a ni. West Bengal Governor te a lo ni tawh a. Amah hi pa tumlum leh hrohrang na tâk a ni a. Governor anih chhung hian Chief Minister Mamata Banerjee nen an inkar a ṭha loin an boruak pawh sawi tur a tam ṭhin hle anih kha. Minister of State for Parliamentary Affairs pawh a ni tawh.

Vice President Secretariat aṭanga thu chhuah chuan, “Vice President ṭang lai hmun ruak hi thihna, banna avang leh thil dang vanga a awm anih chuan, chu hmun ruak luah tur chuan a hma thei ang bera inthlan tur a ni. Chumi a thlan tlin chuan thlan anih aṭanga kum 5 chhung full term office a luah ang,” tiin.

Source: The Hindu – Huna Kawlvawm.