Lungleiah Leitlangpui Music Festival 2025 Working Committee an ṭhu khawm

#ZONEWS Lunglei October 13, 2025: Vawiin khan Leitlangpui Music Festival (LMF) 2025 Working Committee chu an Chairman, Lunglei District Bawrhsap Pi Navneet Mann hovin Lunglei DC Conference Hall-ah a ṭum hnih nan an ṭhu khawm.

Chairman Pi Navneet Mann chuan Leitlangpui Music Festival chu District khat programme mai ni lo va, state pum programme a nih thu leh India ram pum huap programme-a siam tum a nih thu sawiin, a hlawhtlin theih nan department leh pawl hrang hrangte bakah, mipuite ṭan rualna leh thawh hona a pawimawh thu a sawi a. Mawhphurhna hrang hrang neite chu ṭhahnem ngai tak leh a ṭha thei ang bera an mawhphurhna hlen chhuah tum turin a chah.

LMF Working Committee Vice Chairman, Tourism Director Pi Lalrodingi chuan Mizoramin tourism lama hmasawnna nasa tak a hmuh thu leh tun hnaiah pawn lam aṭanga khualzin lo lut pawh an pun zel thu sawiin, hei hian tualchhung mite sum lak luh a tihpun avangin ram chhung ei leh bar dinhmuna hmasawnna pawimawh tak a nih thu a sawi a. LMF 2025-ah tualchhung mi bakah, khaw dang leh pawn lam aṭanga khualzin tam zawk an lo tel beisei a nih thu sawiin, chumi dawl zo tur leh Kut hlawhtling tak buatsaih tura theih tawp chhuah turin mawhphurtu hrang hrangte a chah bawk.

Working Committee Secretary & Lunglei Municipal Council (LMC) Chief Executive Officer (CEO) Pu Malsawmtluanga’n hma lakna kalpui tawh chin report a pe a. Department hrang hrangte hma lakna report ngaihthlak niin, event management agency (EMA) atana thlan, Brighter Co. leh BBY Animals lam aṭangin an inbuatsaihna report ngaihthlak a ni bawk.

Leitlangpui Music Festival 2025 hi November ni 13-15, 2025 (Ningani-Inrinni) chhungin Pukpui Kawmzawlah buatsaih tura ruahman a ni a. Zai, lam, hnam thil leh kut them thiam thil pho chhuahna, thuam leh ei leh in chi hrang hrang zawrhna leh intihhlimna chi hrang hrangte buatsaih leh tura ruahman a ni.

Tunah hian dawr (stall) hawng duhte tan inziah luhna hun hawn mek niin, sawrkar department, pawl leh mimal sumdawng 86 an inziak lut tawh a. Leitlangpui Music Festival puala Leitlangpui Band Contest 2025 buatsaih turah band 29 inziak lutin, Mizoram pawn aṭangin band 8 (28%) an tel a. Hei hi Mizoram rimawi chanchina mellung thar, ram pawn aṭanga band tel tam ber record a ni a. Top 10-a tel tur thlanna, audition hi online-a kalpui tur niin, top 10 chin hi LMF ni 2 ni, November ni 14, 2025-ah Kut hmanna hmunah hian live-in an inel dawn a ni.

LMF 2025 atan hian Tourism Ministry aṭangin cheng nuai 25 leh Mizoram sawrkar aṭangin cheng nuai 25, a zavaiin cheng nuai 50 hmuh beisei niin, sum hnar dang dap turin Tourism Director kaihhruai Sponsorship Committee chuan hma an la mek bawk.