NAKUM 2026 AŢANG CHUAN REMNA NI HI HMANG TAWH LO MAI ILA – RUATA SAILO

Pu Duhoma’n remna ni a hrang hranga hmang tawh lovin, a huho a hman a rawtna hi a zahawm viau nachungin, kei chuan nakum aţang chuan hman tawh loh mai ka rawt vethung e. Missionary day January ni 11.1894 pawh a huho a kan lawm theih tawh loh lai a, remna ni 30.06.1986 a huho a lawmna neih lo rawt hi thil tih chi pawh niin a lang lo. A chhan ţhenkhat te han sawi dawn ila, chu chuan side ‘A’ leh ‘B’ a nei nghal ringawt ang, democracy of dawt ah hi chuan side ‘C’ hi kan ngaihtuah thleng phak thin si lo, Kingdom of God ah erawh chuan side ‘A’ bak a awm thei lo tih hre bawk ila:-

1. Inremnaah chuan enganga article tha 371 ‘A’ emaw ‘G’ pawh awm se kan hman tangkai danin a zir si loh chuan engtihna mah a nih theih chuan siloh vangin. Entirnan Restricted Tender dan tha tak pawh kan hmang dik duh chuang lo.
2. Rambuai kan nihna chhan ber ‘Independence’ kan hmuh tak si loh avangin.
3. Kum tina lawmzui hi eng nge a ṭangkaina ni-a, remna kan tih hian kan ram leh hnam tan ṭangkaina a neihzui loh avangin.
4. India ram ropui tak, ralthuam engmah nei lovina tharum thawha hneh tum kha thil theih loh a ni a; âtthlak tak a nih avangin.
5. MNF an lo haw ta a. An rawn hawn langsar ber, State nihna chu, thisen far khat pawh sêng lova, Khasi, Garo leh Manipur, Tripura miten an lo hmuh tawh, keini pawhina kan hmuh theih tawh, Pu Ch. Chhungan an rawn hawn atana a lo khêk kha a ni a. A ropui lo hle. Special provision lah chu mi dangten an lo neih deuh vek tawh a ni a. A enga pawh chu lo ni se, hman ṭangkaina tura kan hman ṭangkai leh miah si lohte an nih avangin.
6. Kum 40 dâwn Remna neih hnu pawha Chawmhlawm ti tiha kan la awm reng mai te leh chu chuan Independence hi kan tum tak tak ngai lo tih a lanchiantir zel avangin.
7. Kum 20 zet Tuboh leh Dolung inkara lêng ang, Ṭah leh Ha Ṭhialna rama awm ang kan ni te kha eng dang vang ni lovin kan cho chhuah a nih avangin.
8. March 1, 1966-a Independence kan puan aṭang khan India sawrkar chuan, an ram khua leh tui ni tawh lova ngaih theiha kan awmtir tawh avanga nasa taka min beih a kan tuar nasat em avangin.
9. Remna ni lawm ṭhinte pawh hian an pawl tihlârna remchangah an hmang ṭhin ni mai a a lan avangin.
10. Kan hla thuah pawh ‘Ramhuai zawlten ngai an awh leh’ tih ang deuh khan ngai kan awhlehna kan lawm a ni bera a lan avangin.
11. Remna siamtute chawimawina niah kan hmang ta a ni bera a lan tawh avangin leh kum 20 zet buai kha hrehawm kan lo ti em a, kha buaina lo tawp ta thut mai kha namen loin kan lawm zui zel a eng inremnna nge an rawn hawpui tih lam kha kan ngaihtuah lem loh avangin.
12. MOU (inhriatthiamtawnna thuthlung) kha ‘Rammutna aṭanga an sual ber bansana’ ralthuamnen an rawn chhuahna tura MOU a ni a, tlawmna ni ni mai a lang, lawm hut hut hi kan inhmeh loh em avangin.
    .
    Pu Denga kha pa fing leh khaw eng dai phak a ni a. India sorkar laka independent sual kha thil namai a ni lo tih chu a hre ngei ang. Mahse, sual lo thei lova tirtu kha Chunglam zawk a ni maithei a sin. Khatih hunlaia B.A, M.A te khan zalenna kha a hmuh theih ang tih an ring a an zui a ni. Chung parawn deuhho a ngaih ten Pu Denga kha an zui vang khan mi tam tak an hmin a ni. Hei tih lai hian ‘India ram atanga Independent tum chu pialtlep a liluh tum ang ani’ ti pawl an awm bawk. Heng thu te hi tuna tan darthlalang ni thei se.

Missionary day 11.01.1894 pawh a huho a kan lawm theih tawh loh lai a, thenkhat ten tlawmna ni ti hial a an lo sawi, ni 30.06.1986 hi chu a hranpa a lawman siam lovin, kan hnam history ah lo inziah lan ve hi duh tawk mai chi niin a hriat e.

Hriattur: Mimal Thu ziak (Article) te hi Zonews ngaihdan a ni vek kher lo.