Serchhipah PM Vishwakarma kalpui dan chungchang an sawiho

#ZONEWS Serchhip August 20, 2025: Vawiin khan PM Vishwakarma kalpui dan chungchang sawihoin Serchhip District Level Committee chu an Chairman Pu Paul L Khuma hovin DC Meeting Hall-ah an thukhawm.

PM Vishwakarma hi kutthemthiamna lama eizawn tumte tana sawrkar laipui ruahmanna a ni a. Commerce & Industries, Labour Employment Skill Development & Entreprenuership Department te leh Bank te thawhhonain a thlawna training buatsaih thin a nih bakah training a tel te hnenah stipend pek an ni a, loan puk duh te tan dahkham ngai lo leh pung hniam taka pek an ni thin bawk a ni.

Vawiin meeting ah hian Serchhip District dinhmun tlangpui ngaihthlak niin training tha taka kalpui mek a ni a. Chutihlaiin, sawrkar portal-a inziak lut tawh si, training a kal duh leh ta lo engemawzat an awm thu ngaihthlak a ni a. Hei bakah hian Bank atanga loan puk kawngah training chhuak thenkhat ten harsatna an tawh dan ngaihthlak a ni bawk.

DC chuan PM Vishwakarma tha taka Serchhip District ah kalpui mek a ni chu lawmawm a tih rualin a hun takah report thehluh a tul thu te, harsatna awm apiang te hriattir a, bawhzui dan tur ruahmanna tha zawk zawn zel a tul thu te a sawi a.  He Central Sector Scheme hi Serchhip District chhunga kutthemthiam ten eizawnna puitling an neih theih nana thil tangkai tak a ni tih hria a, portal-a inziaklut tawh te chuan training hi paltlang ngei turin a fuih a ni.