SPORTS & YOUTH SERVICES MINISTER-IN NORTH EAST NSS FESTIVAL 2025 HAWNNA HUN A HMANPUI

#ZONEWS Aizawl August 06, 2025: Sports & Youth Services Minister Pu Lalnghinglova Hmar chuan vawiin khan Art & Culture Auditorium, Berawtlangah North East National Service Scheme (NSS) Festival 2025 hawnna hun chu khuallian niin a hmanpui.

He kut hi Mizoram Sports & Youth Services Department hnuaia State NSS Cell leh Ministry of Youth Affairs & Sports hnuaia Regional Directorate of NSS-te buatsaih a ni.

Minister Pu Lalnghinglova Hmar chuan NE NSS Festival 2025 Mizoramin a thleng chu lawmawm a tih thu sawiin, NSS chu thalaite hnena zirlaibu pawn lama thil pawimawh zirtirtu, khawtlanga an mawhphurhna hriattirtu a ni, a ti a. Mizoramah ngei pawh NSS hnathawh rah chu awmze nei leh hmuh theihin a awm tih sawiin, COVID laia an tangkaizia leh, thing phun leh faina lama an thawhhlawkzia a tarlang a.

S&YS Minister chuan he kut hi hnamzia leh tobulte inzirtawnna atan leh thian tha leh inthlunzawmna tha siamna atana hmang turin hmarchhak state hrang hrang atang lo kal NSS volunteer-te chu a chah a. Ramin a mamawhna au aw chu NSS kaltlanga chhang a, khawtlang khaichhuahna atana an theih ang tawka an thawk chu lawmawm a tih thu sawiin, NE NSS Festival chu hlim tak leh hlawk taka hmang turin duhsakna a hlan a ni.

Pu D. Carthigueane, Regional Director, Regional Directorate of NSS (NER), Guwahati chuan festival hman dan tur tlangpui tarlangin, NSS chu zirlaite inhmanna liantham berte zinga mi a ni tih a sawi a. Volunteer mtd 4 vel an nei mek a, tun atanga rei lo teah volunteer mtd 6.5 an tling thei tura ngaih a ni. Hmarchhak bial chauh hian an pual bika NSS Festival an neih thu leh, he hun hi inzirna atana hmang tangkai turin kalkhawmte chu a chah a ni.

Pu N.C. Deori, Youth Officer, Regional Directorate of NSS (NER), Guwahati pawhin thu tawi sawiin, kum 2014-a hman tan a nih atanga tun thlenga NE NSS Festival hman a la ni thei chu a lawmawm a, kum 2047 hmaa India ram Developed Country a hlankai a nih theihna atana hmalakna, Viksit Bharat, zulzuia inhmakhua nan pawh he kut hi a pawimawh a ni, a ti.

Dr. Lalrinmawia, State NSS Officer, State NSS Cell, Mizoram chuan NSS Mizoram hmalaknate, an hlawhtlinna lo chan tawhte leh NE NSS Festival thil tumte a tarlang a. Kum 1972-a Pachhunga University College-a NSS unit din kha Mizorama a hmasa ber a ni a. Tunah chuan zirna in 103-ah NSS unit din tawh niin, kum 1988 khan State NSS Cell din a lo ni tawh bawk.

State NSS Officer Dr. Lalrinmawia report atanga hmuh danin, NSS chu pawl anga a thlawna thisen pe tamte zinga pakhat a ni a. Thisen pek camp hi 2024-2025 chhungin vawi 82 buaisaih tawh niin, thisen unit 6000 chuang pek a ni a. Thing phun, khawpui then fai leh awareness campaign hrang hrang an lo huaihawt tawh bawk. Kum tin, khawtlang tana thil tangkai, waiting shed, public bench, vantlang zunin leh a dangte 60 chuang sak thin a ni a. NSS Cell Mizoram chu hmarchhak state-te zinga kum tina Annual Report chhuah thei awmchhun a ni.

North East NSS Festival 2025 hawnna hun hi Prof. Benjamin L. Saitluanga, Programme Coordinator, NSS Cell, Mizoram University (MZU)-in kaihruaiin, kalkhawmte lawmna thu a sawi nghal a. Dr. Zothanpuia, Programme Officer, Pachhunga University College chuan lawmthu sawiin hun a khar a ni.

North East NSS Festival hian ni nga chhung, August ni 5, 2025 (Thawhlehni) atanga August ni 9, 2025 (Inrinni) thleng, a awh dawn a. Hmarchhak state hrang hrang – Mizoram, Assam, Manipur, Nagaland, Tripura, Sikkim leh Meghalaya – atangin NSS volunteer 250 vel leh Programme Officer-te a hmuna riakin an tel a. Arunachal Pradesh atanga lo kal turte erawh an rawn tel thei lo a ni.

He kutin a tum ber chu hmarchhak state-a thalaite’n inpawhna tha an neih theih nana hruaikhawm a, NSS kalhmang leh thiltumte hrilhhriat a, an kal zelna atana tangkai tur zirtir a ni a.

A hnuaia mite hian thupui hrang hrang zirtirin hun an hmanpui ang:

Ice Breaking : Dr. Lalrinsangi Nghinglova, Associate Professor, Govt. Zirtiri Residential Science College, Aizawl

Motivational Speech Programme : Ms. Grace Lalrinpari Hauzel, Youth Representative of India, Viksit Bharat Young Leaders Dialogue 2025

Motivational Speech Programme : Mr. Rex Zarzoliana Vanchhawng, MPS, Superintendent of Police, Aizawl

My Bharat Portal : Mr. D. Carthigueane, Regional Director, Regional Directorate of NSS (NER), Guwahati

Basic Concept and Design of NSS : Mr. N.C. Deori, Youth Officer, Regional Directorate of NSS (NER), Guwahati

Motivational Speech Programme : Mr. Remlalliana Hnamte, MCS PS to Minister of State, Aizawl

Environmental Education Programme : Mr. Ashis Kumar Roy, National Awardee, West Bengal

Voluntary Blood Donation : Ms. F. Lalmuanpuii, Assitant Director, Mizoram State AIDS Control Society, Aizawl

Entrepreneurship : Mr. Rinzuala, CEO, Mizoram Startup Mission (MSUM)

He’ng bakah hian cultural programme-te, walkathon (Fit India Movement)-te, social work-te neiin, Reiek Tlang an tlawh bawk ang a. August ni 9, 2025 (Inrinni)-ah Festival kharna hun hman a ni ang.