ZPM enchhin sorkar pian aṭanga April 29,2025 thleng khan Restricted Tender hmangin hna lian tak tak 47, cheng vbch 316.38 (Rs.3,16,38,35,821) chuang man a pe chhuak tawh. – MPCC

#ZONEWS July 18, 2025: Nimin July ni 17, 2025 khan Aizawl Press Club-ah thuthar lakhawmtute kawmin MPCC Spokesperson Dr Lallianchhunga chuan ZPM ENCHHIN SORKAR hi a pawng ataka sawisel an duh lo va. anmahni ngei pawhin Eptu party an nih laia nasa taka an sawisel ṭhin, ENCHHIN SORKAR an din hnua an KALPHUNG THAR felhlel tak te hi finfiahna nen thlap tarlan zel hi Eptu Party nihna anga an mawhphurhna a ni a. Mizoram mipuite hian thudik an hriat a, eng ang ENCHHIN SORKAR nge kan hrawn mek, an sawi angin an awm em, ‘kan ti ang’ an tih an ti em? tihte kan hriatfiah theihna turin Congress party chuan theihtawp a chhuah zel dawn a ni, a ti a.

Dr Lallianchhunga chuan , ZPM party hotute’n entu party an nih laia an sawisel nasat em em chu MNF hnuaia ‘Restricted Tender’ an pek dan kha a ni. Mizoram mipui mak tih khawpin MNF sorkar khan a duhsak zawng te RESTRICTED TENDER hmangin hna a pe ṭeuh ṭeuh a. Congress party leh ZPM ten nasa takin MNF sorkar hnuaia Restricted Tender inpek dan kha kan sawisel reng a ni” a ti a.

Dr Lallianchhunga chuan he thu hi sawiin ZPM Leader Pu Lalduhoma chuan MNF sorkar laia restricted tender inpek dan a sawisel thu leh MNF sorkar hnuaia sum leh pai harsatna nen a sawi zawm thu sawiin Restricted Tender ringawt pawh an tih ve loh chuan Mizoram sum dinhmun nasa takin a siam tha nghal ringawt dawn tia a sawi thu a sawi a.

Hetiang khawpa an sawisel hi sorkar kal tawhte aia uar leh nasa zawkin a kalpui ta hmiah hmiah a. Sorkar document an hmuh theih aṭanga a lan danin April 17, 2025 khan SASCI 2024-25 hnuaia hna cheng vbch 629.17 man chu Restricted Tender hmanga an duhsak zawng te an thawh tir theihna turin Department te chu BLANKET APPROVAL a pe a, hei hi Eptu party an nih laia an thusawi nen a inkalh chiang hle. RTI chhanna aṭanga a lan danin ZPM ENCHHIN SORKAR pian aṭanga April 29,2025 thleng khan Restricted Tender hmangin hna lian tak tak 47, cheng vbch 316.38 (Rs.3,16,38,35,821) chuang man a pe chhuak tawh tih a sawi bawk.

Dr Lallianchhunga chuan, Kum 2023 MLA Inthlanpuia ZPM Manifesto-ah “Contract hnate a tam thei ang ber Open Tender-a koh ṭhin a ni ang” tih a awm a, an Party Manifesto ngei pawh palzuta ZPM ENCHHIN SORKAR in Restricted Tender a kalpui dan hian sorkar belhchiandawl leh rintlak tak a nih loh zia a tilang chiang hle a ni.