LAWNGTLAI DEO IN INKALPAWHNA KAWNGPUI CHUNGCHANGAH MPWD LEH CONTRATOR – TE THUTKHAWM NEIHPUI

#ZONEWS Lawngtlai November 15, 2025:  Lai Autonomous District Council (LADC) hnuaia 12th  Member of District Council (MDC) inthlanpui 2025 – lo awm tur atan a inbuatsaihna kal zelah vawiin khan Pu Donny Lalruatsanga, District Election Officer (DEO) chuan a Office Chamber-ah MPWD Official leh Contractor – te thutkhawm a neihpui.

Pu Donny Lalruatsanga chuan kalkhawmte hnena lawmthu sawina a nei hmasa a. LADC inthlanpui 2025 atan inbuatsaihna chak taka kalpui a nih mek thu a tarlang a. Inthlan hlawhtling taka nei turin inkalpawhna kawng tha tak a pawimawh hle tiin, hnathawktuten theihtawp chhuah a tul hle a ti. Election Official- te a hun taka an duty na tur hmun polling Station – an thlen ngei ngei a ngaih avangin, kawngpui thawm that ngaite theih ang anga lo siam tha turin a ngen a. A bik takin kawngpui dinhmun leh eng motor nge kal thei tih te chu PWD lam te report lo siam a, DEO lamah a hma lamah thehlut turin a chah a. Inthlanna fel fai leh tluang taka neih a nih theih nan mahni zawn theuhah theihtawp lo chhuah turin MPWD leh contractor- te a chah nghal bawk. 

Pu Collin Hlychho Election Officer (EO) chuan inthlanna hlawhtling tak nei tur leh harsatna tawk lo tura thawhpui turin MPWD leh Contractor- te a chah a. Election Official – te tana harsatna siam lo tur leh inbiak pawh a ngaih hunah pawh tha taka indawrna a awm theih nan a thawhpuiah a sawm nghal a ni.

Thutkhawmah hian Election Official, MPWD, Lawngtlai Division, MPWD, Multli- Modal Project Division aiawh, Lawngtlai District chhunga kawngpui enkawl/ siam mek tu Contractor – te, Shri Balaji Construction Company, leh  71 RCC – te an tel thei a . Pu Donny Lalruatsanga chuan lawmthu sawina neiin hun a khar.